500 mıllıonnan astam teńge nesıe alǵan alaıaqtar qamaýǵa alyndy - QR ІІM
ASTANA. 3 shilde. QazAqparat /Arman Asqarov/ - Jambyl oblysynda ekinshi deńgeıli bankterden zańsyz jolmen 500 mln. teńgeden astam nesıe alǵan alaıaqtar ustaldy.
Bul týraly búgingi baspasóz máslıhatynda QR Іshki ister mınıstrliginiń Memlekettik til jáne aqparat departamentiniń basshysy Nurdildá Oraz habarlady.
Onyń sózine qaraǵanda, 9 adamnan turatyn uıymdasqan qylmystyq topty qurǵan jáne basshylyq etken oblys ortalyǵynyń 55 jastaǵy turǵyny búginde ýaqytsha ustaý orynyna qamalyp otyr. 2006 - 2010 jyldar aralyǵynda atalǵan qylmystyq top ekinshi deńgeıdegi bank fılıalynyń dırektory men eki qyzmetkerimen birlese otyryp, kepilge beriletin múliktiń qunyn joǵary baǵalap, tabystaryn rastaıtyn jalǵan qujattardy usyný arqyly 500 mıllıon teńgeden asatyn nesıeler alǵan. Qazirgi kezde tergeý amaldary júrgizilýde.
