500-ge jýyq Túrkistandyq otbasy Soltústikke kóshedi

TÚRKІSTAN. QazAqparat- Túrkistan oblysynan 500-ge jýyq otbasy Soltústikke kóshedi. Bul týraly Túrkistan oblysynyń jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Nurjan Nurashov málimdedi, dep habarlaıdy QazAqparat tilshisi.

Sáýir aıynyń 19-21 kúnderi Túrkistan oblysynan Soltústik óńirlerge «Qonys aýdarý» jármeńkesi ótti. Maqtaaral aýdanynda bastalǵan jármeńke, Saıram aýdanynda jalǵasyp, Túrkistan qalasynda qorytyndylandy.

Pavlodar, Shyǵys Qazaqstan, Soltústik Qazaqstan, Abaı oblystarynan arnaıy kelgen 76 maman Saryaǵash, Keles, Saıram, Ordabasy aýdandaryn aralap, ár sala boıynsha bos jumys oryndaryn usyndy.

«3 kúnniń ishinde 500 otbasy, múshelerin qosa eseptegende 2000-ǵa jýyq túrkistandyq teriskeıge kóshýge nıet bildirip otyr. Jalpy «Qýatty óńirler – el damýynyń draıveri» jobasy aıasynda 2015 jyldan beri Túrkistan oblysynan elimizdiń jumys kúshi jetispeıtin Soltústik óńirlerge halyqty qonystandyrý jumystary júrgizilip jatyr. Nátıjesinde, 2015-2022 jyldar aralyǵynda oblystan 12 000 jýyq adam qonys aýdarǵan»-dedi Nurjan Nurashov.

Bul baǵytta bıyl da respýblıka boıynsha 6727 kvota bólinip otyr. Qonys aýdarýshylar úshin memlekettik qoldaý kórsetetin Abaı, Aqmola, Qaraǵandy, Qostanaı, Pavlodar, Soltústik Qazaqstan, Ulytaý, Shyǵys Qazaqstan oblystary belgilengen. Bólingen kvota negizinde, jyl basynan beri Túrkistan oblysynan 34 otbasy qonys aýdarǵan.