500-ge jýyq qyzylordalyq memqyzmetterdi jolda júrip aldy
QYZYLORDA. QazAqparat - Qyzylorda oblysy aýmaǵynda ótken respýblıkalyq «Jolda qabyldaý» aktsııasy barysynda 500-ge jýyq turǵyn smartfon arqyly 44 memlekettik qyzmet túrin paıdalandy, dep habarlaıdy QazAqparat tilshisi.
Atalmysh shara halyqpen tikeleı baılanysty ornatýǵa óz septigin tıgizdi. Nátıjesinde polıtsııa bólimderi basshylarynyń turǵyndarmen jeke kezdesýin qamtamasyz etý maqsatynda jaǵdaı jasaldy. Eki kúnge sozylǵan aktsııa oblys ortalyǵynda jáne barlyq aýdanda ótkizildi.
«Halyq kóp shoǵyrlanatyn oryndarda arnaıy «Jolda qabyldaý» dep jazylǵan aqparattyq plakatpen rásimdelgen avtobýstar ornalasty. Tártip saqshylarymen júrgizilgen mobıldik qabyldaý kezinde turǵyndarǵa memlekettik qyzmetterdiń qoljetimdigi, onlaın rejımde aıyppuldy tóleý tártibi týraly quqyqtyq keńes berildi. Nátıjesinde sol jerde 500-ge jýyq turǵyn smartfon arqyly 44 memlekettik qyzmet túrin paıdalanýǵa jáne 15 oblys turǵyny termınal arqyly aıyppul tóleýge múmkindik aldy», - dedi Qyzylorda oblystyq polıtsııa departamenti baspasóz qyzmetiniń jetekshisi Gúljahan Qaıyrbergenova.
Oblys aýmaǵynda ótkizilgen aktsııa barysynda turǵyndar túrli máseleler boıynsha mamandardan keńes aldy. Kelgen turǵyndardyń barlyǵy kókeıindegi suraqtaryn erkin qoıyp, tushymdy jaýaptar aldy. Turǵyndar kóbinese quqyqtyq máseleler boıynsha júginip jatty.
Máselen, Qyzylorda qalasynyń turǵyny óz aýlasyndaǵy qurylys jumystaryna Ózbekstan Respýblıkasynyń azamattaryn shaqyrtýǵa zańdy túrde ruqsat alý keńesin aldy.
Departamenttiń kóshi-qon qyzmetiniń bastyǵy polıtsııa podpolkovnıgi Arýyn Joldasbaev azamatshaǵa túsindirme jumystaryn júrgizip, zań boıynsha keńesin berdi.
