500-ge tarta sel qaýpi bar ýchaske baqylaýǵa alyndy
ASTANA. KAZINFORM — Almaty jáne Shymkent qalalarynda, Almaty, Shyǵys Qazaqstan, Jambyl, Túrkistan, sondaı-aq Jetisý jáne Abaı oblystarynda ornalasqan 496 sel qaýpi bar ýchaske esepke alynǵan.
Tótenshe jaǵdaılarǵa jedel den qoıý maqsatynda TJM «Qazseldenqorǵaý» MM quramynda jalpy sany 117 adamnan turatyn 11 avarııalyq-mehanıkalandyrylǵan brıgada qurylyp, 61 arnaıy tehnıka jumyldyryldy.
Gıdrometeorologııalyq jaǵdaıǵa táýlik boıy monıtorıng júrgizýdi «Qazseldenqorǵaýdyń» 30 dıspetcherlik pýnkti men jyl boıy jumys isteıtin 79 baqylaý beketi qamtamasyz etedi. Sel qaýpi kezeńinde qosymsha 38 maýsymdyq beket ashyldy. Yqtımal qaýipti ýchaskelerde 133 eskertý taqtaıshasy ornatyldy.
Profılaktıkalyq jumystar aıasynda «Qazseldenqorǵaý» mamandary TJM aýmaqtyq bólimshelerimen birlesip, sel qaýpi bar ýchaskelerge 541 jerústi jáne 16 áýeden vızýaldy tekserý júrgizdi.
Qazirgi ýaqytta Almaty qalasynda, Almaty jáne Jetisý oblystarynda ornalasqan 15 muzdaq kólde aldyn alý jumystar júrgizý josparlanǵan. Іs-sharalar kesheni sel qaýpin ýaqtyly anyqtaýǵa, tótenshe jaǵdaılardyń aldyn alýǵa jáne halyq pen ınfraqurylym nysandarynyń qaýipsizdigin qamtamasyz etýge baǵyttalǵan.
Qazaqstan TJM sel qaýpi bar barlyq óńirlerde sel jaǵdaıyn júıeli túrde monıtorıng júrgizý jáne aldyn alý sharalaryn iske asyrý boıynsha jumystaryn jalǵastyrýda.
