500-den astam teńiz jaıaý áskeri tank synaǵy daıarlyǵynan ótti

«Batys» óńirlik qolbasshylyǵyna qarasty teńiz jaıaý áskeri brıgadasynyń jas sarbazdary jas jaýynger kýrsy aıasynda negizgi daıyndyq kezeńderiniń birin oryndady.

Áskerı bólimge kelgennen keıin olar jalpyáskerı jarǵylardy oqyp, saptyq jáne dene daıyndyǵynan ótti. Sondaı-aq qarý-jaraq pen áskerı tehnıkany qoldaný daǵdylaryn meńgerdi.

Teorııalyq daıyndyqtan keıin sarbazdar taktıkalyq alańda praktıkalyq tapsyrmalar oryndady. Jaýyngerlik jaǵdaıǵa barynsha jaqyndatylǵan ortada olar jertasaǵa ornalasyp, bos oqtarmen atysty, oqý granatalaryn laqtyryp, saýytty tehnıkamen shartty qarsylasqa qarsy taktıkalyq manevrler jasady.

– Negizgi nazar áskerı qyzmetshilerdi shartty qarsylastyń tank bólimshelerine qarsy is-qımyl jasaýǵa praktıkalyq turǵyda daıyndaýǵa jáne jeke quramnyń psıhologııalyq tózimdiligin qalyptastyrýǵa aýdaryldy. Qoıylǵan barlyq maqsat tolyq kólemde oryndaldy. Jaýyngerler tank synaǵy daıarlyǵynan sátti ótip, kedergiler jolaǵyn eńserdi, – dedi Jas sarbazdardy daıarlaý jıynynyń bastyǵy, podpolkovnık Jeńis Ahmetqalıev.

Onyń aıtýynsha, tank synaǵy daıarlyǵy – jas sarbazdardyń tózimdiligin, óz kúshine senimdiligin jáne kúrdeli jaǵdaıda áreket etýge daıyndyǵyn qalyptastyratyn mańyzdy kezeńderdiń biri.

Aqmola oblysynan shaqyrylǵan gvardııa qatardaǵy jaýyngeri Nurlan Borambaı bul synaqtyń ózine úlken áser etkenin aıtty.

– Tank jertasanyń dál ústinen ótken sátte qatty tolqý men zor jaýapkershilikti sezinesiń. Biraq dál osyndaı sátterde sabyr saqtaýdy úırenip, jaýyngerlik tájirıbe jınaısyń. Komandırler men joldastarymnyń qoldaýynyń arqasynda qorqynyshty jeńip, óz kúshime degen senimimdi arttyrdym, – dedi ol.

Praktıkalyq sabaqtar jas sarbazdardy áskerı qyzmet jaǵdaıyna moraldyq-psıhologııalyq turǵydan beıimdeýge baǵyttalǵan.

Aıta keteıik, jas jaýynger kýrsynan keıin 23 mamyr kúni teńiz jaıaý áskerleri Áskerı ant qabyldaıdy.

Eske salaıyq, áskerden keıin tegin oqýǵa múmkindik alǵan qazaqstandyqtardyń tizimi jarııalandy.