500-den astam soltústikqazaqstandyq jas áskerge attanady

PETROPAVL. QazAqparat – «El tiregi» respýblıkalyq naýqany aıasynda Soltústik Qazaqstan oblysynan jigitterdiń alǵashqy toby Otan aldyndaǵy boryshyn óteýge áskerge attandy, dep habarlaıdy QazAqparat tilshisi.

Soltústik óńirden attanǵan 21 sarbaz Shyǵys Qazaqstan oblysynyń Kúrshim aýdanynda ornalasqan UQK Shekara qyzmetiniń áskerı bóliminde mindetin atqarady.

Jigitterdi QR Qarýly Kúshteriniń jáne Aýǵan soǵysynyń ardagerleri, týǵan-týystary men dostary saltanatty túrde shyǵaryp salyp, Otan aldyndaǵy qasıetti paryzdy abyroıly oryndap, aman-esen úılerine oralýlaryna tilektestik bildirdi. Kelesi kezekte bolashaq sarbazdar Semeı, Aqtóbe, Almaty, Astana, Qostanaı Qaraǵandy baǵyttary boıynsha áskerge attanady.

SQO Qorǵanys isteri jónindegi departamenttiń bastyǵy Talǵat Áliqulovtyń aıtýynsha, áskerı bólimderden ofıtserler kelip, 3 kún ishinde irikteý jasaıdy. Áskerge jiberiletin azamattarmen jáne olardyń ata-analarymen áńgimelesip, zerdeleý jumystary júrgiziledi.

«El armııasynyń qataryn saıdyń tasyndaı sarbazdarmen jasaqtaý - zor jaýapkershilikti júkteıtin jumys. Óıtkeni búgingi bozbala erteń ásker qataryna qosylǵanda eldiń shetinde, jeldiń ótinde júrip, el tynyshtyǵyn qorǵaıdy. Ata-ananyń alaqany, jyly uıasynan shyqan jas jigit »ásker« atty úlken mektepte shyńdalady, shynyǵady», - deıdi Talǵat Áliqulov.

SQO Qorǵanys isteri departamenti baspasóz qyzmetiniń málimetinshe, bıyl kúzgi shaqyrylymda respýblıka boıynsha 30 myń, al SQO boıynsha 500-den asa azamat áskerge attanady.