500-den astam qandas stýdent Astanada bas qosty
ASTANA. KAZINFORM — Mońǵolııa, Qytaı, Ózbekstan, Reseı, Qyrǵyzstan jáne basqa da elderden kelip, Qazaqstanda bilim alyp jatqan 500-den astam qandas stýdent Astanada ótken jastar forýmynda kezdesti. Olar bilim alý, jumysqa ornalasý, kásip bastaý jáne kásibı turǵydan damý múmkindikterin talqylady.
L. N. Gýmılev atyndaǵy Eýrazııa ulttyq ýnıversıtetinde «Otandastar kezdesýi: Jastar forýmy» ótti. Basqosý atajurtqa oralǵan jastardy Qazaqstandaǵy múmkindiktermen jaqynyraq tanysýyna jol ashty.
Forýmnyń basty maqsaty — shetelden kelgen qazaq jastarynyń bilim men eńbek naryǵyndaǵy áleýetin ashý, qoǵamǵa beıimdelýine kómektesý jáne eldegi kásibı damý men kásipkerlik múmkindikterin tanystyrý.
— Baǵdarlama aıasynda motıvatsııalyq sessııa uıymdastyrylyp, spıkerler jastarmen bilimniń mańyzy, ulttyq qundylyqtar, maqsat qoıý, kóshbasshylyq, tulǵalyq damý jáne kásipkerlik týraly oı bólisti. Stýdentter spıkerlerge kókeıdegi suraqtaryn qoıyp, ashyq pikir almasty. Ásirese Qazaqstanda jumysqa ornalasý, kásip ashý, bilimin jalǵastyrý jáne kásibı ortaǵa beıimdelý máseleleri talqylandy, — dep habarlaıdy Otandastar qory.
Forým aıasynda qandas stýdentterdiń tyń ıdeıalaryn qoldaýǵa baǵyttalǵan «OQ-startup» shyǵarmashylyq baıqaýynyń jeńimpazdary da marapattaldy. Baıqaý ınnovatsııalyq, áleýmettik jáne shyǵarmashylyq jobalardy anyqtap, jastardyń bastamalaryna qoldaý kórsetý maqsatynda ótkizilgen.
