500-den astam birinshi kýrs stýdenti Áskerı-tarıhı mýzeıge bardy
ASTANA. KAZINFORM – Quralbek Qulajanov atyndaǵy Qazaq tehnologııa jáne bıznes ýnıversıteti áskerı kafedrasynyń stýdentteri QR Qarýly kúshteri Ulttyq áskerı-patrıottyq ortalyǵynyń Áskerı-tarıhı mýzeıinde boldy. Bul týraly Qorǵanys mınıstrligi habarlady.
Kásibı gıdter bolashaq zapastaǵy ofıtserler men serjanttarǵa Qazaq handyǵy dáýirinen bastap qazirgi kúnge deıingi Qazaqstannyń áskerı tarıhyn tanystyrdy.
Іs-shara «Máńgilik El» atrıýmynda vzvodtardyń sap túzeýimen bastaldy. Odan keıin stýdentter «Ejelgi dáýir – XIX ǵasyr», «XX ǵasyrdaǵy áskerı tarıh», «XX–XXI ǵasyrlar qarý-jaraǵy», «Tank áskeri tarıhy» jáne «Qazaqstan Respýblıkasy Qarýly kúshteri» zaldaryn aralady.
– Bizdiń kafedrada segiz joǵary oqý ornynyń stýdentteri oqıdy. Olardyń qatarynda Nazarbaev Ýnıversıteti men M.S.Nárikbaev atyndaǵy QazMZÝ da bar. Biz zapastaǵy ofıtserlerdi daıarlaımyz. Bıyl alǵash ret zapastaǵy serjanttar bitirip shyqty. Oqý kıberqaýipsizdik, tyldyq qamtamasyz etý, aýmaqtyq qorǵanys jáne basqa da mamandyqtar boıynsha júrgiziledi. Sonymen qatar biz rota komandırleriniń tárbıe jáne ıdeologııalyq jumystar jónindegi orynbasarlaryn da daıyndaımyz, – dep atap ótti Qazaq tehnologııa jáne bıznes ýnıversıteti Áskerı-patrıottyq tárbıe ortalyǵynyń bastyǵy zapastaǵy vıtse-admıral Jandarbek Januzaqov.
Ýnıversıtettegi áskerı kafedra ekinshi jyl jumys istep jatyr. Qysqa merzim ishinde áskerı-patrıottyq tárbıe men áskerı oqytylǵan rezervti kásibı daıarlaý ortalyǵy retinde jaqsy tanyldy.
– Áskerı-tarıhı mýzeıge ekskýrsııa barysynda elimizdiń erlikke toly tarıhynan mol málimet aldyq. Biz tas dáýirinen búgingi kúnge deıingi qazaq jaýyngerleriniń oq-dárilerin, qarý-jaraqtaryn, kartınalar men tarıhı qujattardy, fotosýretterdi kórdik. Batyr babalarymyz ben qazirgi áskerimizge degen maqtanysh sezimi paıda boldy. Mektepte «Jas sarbaz» áskerı-patrıottyq klýbyna qatysqan edim. Qazir kafedrada árbir Otan qorǵaýshyǵa qajet bilim men daǵdylardy úırenip jatyrmyn, – dedi áskerı kafedranyń birinshi kýrs stýdenti Oljas Samarhan.
Іs-shara patrıottyq rýhty nyǵaıtýǵa, azamattyq jaýapkershilikti qalyptastyrýǵa jáne Otan aldyndaǵy qyzmettiń mańyzdylyǵyn uǵynýǵa yqpal etken mańyzdy oqıǵa boldy.
Aıta keteıik, áskerı mýzeı basshysy áskerı-patrıottyq is-sharalar óskeleń urpaqty otandy súıýge tárbıeleýde mańyzdy ekenin aıtty. Mýzeıdiń maqsat, mindeti de sol – jas urpaqty patrıot bolýǵa baýlý.