500 astam jas daryn Delfıı oıyndaryna qatysady
ASTANA. QazAqparat - Astanada 12-14 sáýirde Qazaq Ulttyq óner ýnıversıtetinde Delfıı oıyndary ótedi. Oıyndar baıqaý baǵdarlamasy túrinde uıymdastyrylady.
Oǵan 10-25 jastaǵy 500 astam jas daryn qatysady dep kútilýde. Bul týraly astana.kz saıtyna is-sharany uıymdastyrýshylar habarlady.
Baıqaý qorytyndysy boıynsha fortepıano, skrıpka, akademııalyq án aıtý, halyq áni, estradalyq án; baıan, akkordeon, garmon; halyq aspaptary - qobyz, dombyra; fotosýret, beıneleý óneri, poezııa, dı-djeı atalymdary boıynsha jeńimpazdar anyqtalady.
Qazaqstan Respýblıkasynyń jáne qalalyq eńbegi sińirgen mádenıet jáne óner qaıratkerlerinen qurylǵan qazylar alqasy ár atalym boıynsha jeke baǵa beretin bolady.
Aıta keteıik, Delfıı oıyndary daryndy shyǵarmashyl jastardy anyqtaý jáne olarǵa qoldaý kórsetý, jas býynnyń patrıottyq sezimin qalyptastyrý, elge degen maqtanysh sezimin oıatý, jastardyń boıynda toleranttylyq pen basqa mádenıetterge degen qyzyǵýshylyqty tárbıeleýge baǵyttalǵan.
Sonymen qatar, atalǵan jarys daryndy jastarǵa óziniń ónerin pash etip, álemdik mádenıet tarıhyna qatystylyǵyn sezinýge múmkindik beredi.
