500 áskerı qyzmetker Astana kóshelerimen júgirip ótti
ASTANA. 28 sáýir. QazAqparat - QR Qorǵanys mınıstrliginiń áskerı bólimderi men mekemeleriniń qyzmetshileri elimizdiń Qarýly kúshteriniń qurylǵanyna 20 jyl tolýyna oraı jappaı júgirý sharasyn uıymdastyrdy.
«Sport pen áskerı qyzmet bir-birinen ajyramas túsinik. Sport rýhty, kúsh-qýatty, yntany, jeńiske degen jigerdi, naǵyz kóshbasshylardy tárbıeleıdi. Bul árbir sarbazdyń boıynda bolýy tıis. Qazaqstan tarıhı dástúrli sport túrlerimen tanymal. Ózderińiz biletindeı, at sporty túrleri, qazaqsha kúres qazirgi ýaqytta óz jemisin berýde. Táýelsizdik alǵan kúnnen beri bizdiń elimizde memlekettiń irgesin myǵymdap, ata-babasynyń dástúrin jalǵastyratyn deni saý urpaq tárbıleý mindeti turdy», - dep atap ótti sharaǵa qatysýshylardyń aldynda sóz sóılegen QR Qorǵanys mınıstriniń orynbasary Sergeı Gromov.
Bul rette ol QR Prezıdenti, QR Qarýly Kúshteriniń Bas qolbasshy N.Nazarbaev sportpen aınalysyp qana qoımaı, ony nasıhattaý arqyly da barsha qazaqstandyqqa úlgi kórsetip otyrǵandyǵyn basa aıtty.
Onyń atap ótýinshe, el azamattarynyń 50 paıyzdan astamyna sportpen aınalysýǵa moıyndary jar bermese, tek 15 paıyzy ǵana sport túrlerimen belsendi aınalysady.
Sonymen 500-den astam áskerı qyzmetshi elordanyń sol jaǵalaýyndaǵy Dostyq, Turan, Táýelsizdik, Túrkistan kósheleri boıymen júgirip, Qorǵanys mınıstrliginiń ǵımaratynyń janyna qaıtyp oraldy.
