500 adam qujatty zańsyz alǵan: Shymkentte júrgizýshi kýáligin satqandar sottaldy
ShYMKENT. KAZINFORM — Shymkentte júrgizýshi kýáligin zańsyz berý faktisi boıynsha uzaq ýaqytqa sozylǵan sot otyrysy aıaqtaldy. Mamandandyrylǵan halyqqa qyzmet kórsetý ortalyǵynyń qyzmetkerleri memlekettik qyzmetti tabys kózine aınaldyryp, júrgizýshi kýáligin mindetti emtıhansyz berip kelgen.
Shymkenttiń qylmystyq ister jónindegi mamandandyrylǵan aýdanaralyq sotynda úkim shyqty. Іske barlyǵy 15 adam qatysty. № 2 Mamandandyrylǵan halyqqa qyzmet kórsetý ortalyǵynyń 4 qyzmetkeri bir jyldan 6 jyl 8 aıǵa deıin bas bostandyǵynan aıyryldy. Deldal bolǵan taǵy 10 aıyptalýshy túrmeden bosatyldy. Olardyń keıbireýi kámeletke tolmaǵan balalarynyń bolýyna baılanysty raqymshylyqqa ilikken.
Іs boıynsha basty aıyptalýshy № 2 Mamandandyrylǵan halyqqa qyzmet kórsetý ortalyǵynyń burynǵy basshysy Jomart Muráshimov birneshe aı buryn qaıtys bolǵan. Ol 18 tamyz kúni tergeý ızolıatorynda densaýlyǵynyń kúrt nasharlaǵanyna shaǵymdanyp, kelesi kúni aýrýhanada kóz jumǵan.
Tergeý barysynda 2023-2024 jyldary Jomart Muráshimov bastaǵan memqyzmetker turaqty sybaılas jemqorlyq shemasyn uıymdastyrǵany anyqtaldy. Olar teorııalyq jáne tájirıbelik emtıhandardy boldyrmaı, júrgizýshi kýáligin satyp kelgen.
Sýdıa Samıdın Temiralıev úkimdi jarııalaı otyryp, iske qatysýshylardyń kelisip áreket etkenin atap ótti.
— Sottalǵandar syıaqy úshin ortalyqqa kelgen azamattarǵa túrli kómek kórsetti. Keıbireýin oqytty, taǵy keıbirin daıyndady. Olar qarajat úshin top uıymdastyrýshylarynyń nusqaýy boıynsha kelgen azamattardyń teorııalyq jáne praktıkalyq emtıhandaryn sátti tapsyrýyn qamtamasyz etken. Qujat alýshylardy emtıhanda oń nátıjege jetkizetin jaýapty tulǵalarǵa baǵyttaǵan, — dedi sýdıa.
Bul zańsyz qyzmetterdiń quny 150 000 teńgeden 400 000 teńgege deıin baǵalanǵan.
Tergeýshilerdiń málimetinshe, kem degende 500 adam júrgizýshi kýáligin zańsyz alǵan. Eki jyldyń ishinde kiris 150 mıllıon teńgeden asty. Tergeý aıasynda sottalǵandardan 200 mıllıon teńgeden astam qarjy tárkilendi.
Bıyl mamyr aıynda Qarjylyq monıtorıng agenttiginiń Shymkent qalasy boıynsha departamenti prokýratýranyń úılestirýimen júrgizýshi kýálikterin júıeli túrde zańsyz berýmen aınalysqan uıymdasqan qylmystyq toptyń áreketin toqtatty.