50 jyldan keıin «Altyn tóbe» saq qorǵanynda jumys qaıta jańǵyrdy

PAVLODAR. QazAqparat - Jelezın aýdanynda 50 jyldan keıin «Altyn tóbe» saq qorǵanynda arheologııalyq qazbalar jumysy qaıta jańǵyrdy. Bul týraly óńirlik kommýnıkatsııalar qyzmetinde ótken jıynda Jelezın aýdanynyń ákimi Qanat Qashkırov málim etti, dep habarlaıdy pavlodarnews.kz.

«Altyn tóbe» saq qorǵandary Novosibir oblysymen shekaralas Jańajuldyz aýylynda ornalasqan», - dedi aýdan basshysy. - Sońǵy ret mundaı qazba jumystary 70-shi jyldary professor Chalaıa kelgende ǵana júrgizildi. Ol jyldary professor alǵashqy adamdardyń turaǵyn zerttegen bolatyn. Bıyl «Rýhanı jańǵyrý» baǵdarlamasy aıasynda bul jumysty qaıta jańǵyrtyp otyrmyz.  Keshe ǵana aýdanǵa Pavlodar memlekettik pedagogıkalyq ýnıversıtetiniń «Marǵulan» ortalyǵynan mamandar keldi. Aldaǵy ýaqytta olarǵa ortalyq jetekshisi Tımýr Smaǵulov qosylady. Sonymen qatar, aýdannyń 70-ke jýyq joǵary synyp oqýshylary da osy ekspedıtsııaǵa qatysýǵa dep nıet bildirýde. Ekspedıtsııa tehnıkamen jáne ózge de jabdyqtarmen qamtylǵan».

«Marǵulan» ortalyǵynyń jetekshisi Tımýr Smaǵulov ekspedıtsııa eki aıǵa jalǵasatynyn aıtty. - Bizdiń maqsatymyz - kóshpendilerdiń biregeı eskertkishterin zertteý. Osy jerde alǵashqy ret arnaıy ǵylymı baǵdarlamany qoldanyp, júıeli jumys júrgizetin bolamyz. Ekspedıtsııa maýsym jáne shilde aılarynda  ótedi, - dedi Tımýr Smaǵulov.

Qanat Qashqırovtyń aıtýynsha «Altyn tóbede» júrgizilgen zertteýler nátıjesi ǵylymı-tájirıbelik konferentsııa barysynda aıtylatyn bolady.