50 jyldan keıin alǵash ret Maıamıden Kýbaǵa krýızdik laıner qatynaı bastady
ASTANA. QazAqparat - AQSh pen Kýbanyń qarym-qatynasy qalpyna kelýine baılanysty Maıamıden Kýbaǵa 50 jyldan keıin alǵash ret krýızdik laıner jolǵa shyqty, dep habarlady VVS agenttigi.
Bortynda 700 jolaýshy bar «Adonııa» kemesi Maıamı kemejaıynan jeksenbiniń keshinde attanyp, Gavanaǵa dúısenbi kúni jetýi tıis.
«Adonııanyń» operatory, Carnival Corporation kompanııasy bolashaqta Kýbaǵa krýızderdi aı saıyn uıymdastyrýdy josparlap otyr.
Raýl Kastro basqarǵan Kýba úkimeti el azamattaryna AQSh-qa teńiz arqyly saıahattaý ruqsatyn resmı túrde ótken aptada ǵana bergen bolatyn. Keme jolaýshylarynyń arasynda araldan bala kezinde ketken adamdar da bar. Olar kýbaǵa ondaǵan jyl ótken soń alǵash ret qaıtyp oralmaq.
