50 jyldan asa otasqan jup baqyttyń formýlasyn aıtty

ASTANA. KAZINFORM — Baqytty shańyraqtyń syry — eńbek pen syılastyqta. Osyndaı ómirlik ustanymdy tý etken Ahmetovter otbasy «Shańyraq kúninde» otbasy qundylyqtarynyń mánimen bólisti.

Eńbek joly atadan jalǵasqan áýletten búginde 48 temirjolshy shyqqan. Jalpy eńbek ótili 1600 jylǵa jetetin otbasy — tutas bir eńbek dınastııasy.

Otaǵasy Kendaı Ahmetov 72 jyldyq ǵumyrynyń 48 jylyn Saryshaǵan jáne Astana stantsııalarynda eńbek etýge arnaǵan. Jubaıy Kúlán Ahmetovamen temirjol salasynda tanysyp, 1975 jyly Saryshaǵanda shańyraq kótergen.

Erli-zaıyptylar tórt balany eńbekqorlyqqa jáne adamgershilikke baýlyp ósirgen. Respýblıkalyq «Mereıli otbasy» baıqaýynyń jeńimpazy atanǵan.

— Temirjol bizdi tabystyrdy. Jubaıym Kúlánmen otasqanyma 40 jyldan asty. Úıde de, jumysta da birge boldyq. Ystyq pen sýyqty birge ótkerdik. Eńbektene júrip, balalardy ósirip, jetildirdik, — deıdi áýlettiń otaǵasy Jibek Joly telearnasynyń «Búgin Live» baǵdarlamasynda.

Kúlán Ahmetova baqytty otbasynyń negizi ózara túsinistik pen tózimde ekenin atap ótti.

— Jastarǵa aıtarym, tózim men sabyrdy serik etse, ár otbasy óziniń baqyt formýlasyn taba alady, — dedi ol.

Aıta keteıik, Astanada «Naýryznamanyń» onkúndigi aıasynda «Shańyraq kúnine» arnalǵan birqatar mańyzdy is-shara josparlanyp otyr.