50 jastaǵy Rýdnyı turǵyny alǵash ret jeke kýáligin aldy

QOSTANAI.QazAqparat ‐ Qostanaı oblysynyń týmasy 50 jyldan keıin alǵash ret jeke basyn kýálandyratyn qujat aldy, dep habarlaıdy QazAqparat.

Oblystyq probatsııa qyzmetiniń mamandary Rýdnyı polıtsııa basqarmasymen birlesip, 1970 jyly týǵan er adamǵa jeke qujattaryn rásimdeýge kómektesti.

«Onyń aıtýynsha, ómirlik qıyn jaǵdaılardyń saldarynan jeke qujatyn alatyn múmkindigi bolmaǵan. Qazir bul másele sheshilip, ol áleýmettik jáne medıtsınalyq qyzmetterdi ala alady. Turǵylyqty jeri boıynsha qujattandyrý jáne tirkeý jumystary tolyq kólemde júrgizildi, nátıjesinde ol azamat kópten kútken jeke kýáligin aldy», - dedi Rýdnyı qalasy probatsııa qyzmetiniń bólim bastyǵy Azamat Bekishev.

Jeke kýáligine qoly jetken rýdnyılyq probatsııa qyzmeti men kóshi-qon polıtsııasynyń qyzmetkerlerine alǵys aıtty.

Qazirgi ýaqytta probatsııa qyzmeti jumyspen qamtý ortalyǵymen birlesip ony jumysqa ornalastyrý máselelsin qarastyryp jatyr.