50 úkimettik emes uıym Elbasynyń aǵymdaǵy jylǵy Joldaýyn túsindirý jumystaryn bastady

STANA. Tamyzdyń 10-y. QazAqparat /Marlan Jıembaı/ - Memleket basshysy Nursultan Nazarbaev óziniń aǵymdaǵy jylǵy Joldaýynda Úkimetke Qazaqstannyń 2020 jylǵa deıingi áleýmettik-ekonomıkalyq jáne saıası damýynyń negizgi erejelerin túsindirý maqsatynda buqaralyq aqparat quraldary men úkimettik emes uıymdarǵa qoldaý kórsetýge 1 mıllıard teńge bólýdi tapsyrǵan bolatyn.

Osyǵan oraı búgin QR Prezıdenti Ákimshiligi basshysynyń orynbasary Máýlen Áshimbaev atalǵan mindetti júzege asyrýǵa qulshynys bildirgen úkimettik emes uıymdardyń jetekshilerimen kezdesip, aldaǵy mindetterdi talqyǵa saldy.

Jıyn barysynda elimizdiń Mádenıet mınıstrliginiń jaýapty hatshysy Janna Qurmanǵalıeva bul tapsyrmanyń oryndalǵanyn jarııa etti. Onyń aıtýynsha, mádenıet mınıstrligi ashyq konkýrs negizinde jeńimpaz dep tanylǵan 50 ÚEU-men kelisimshartqa otyryp, qazirgi ýaqytta olar jumystaryn bastap ta ketken.

Alqaly jıynda negizgi sóz tizginin qolyn alǵan M.Áshimbaevtyń atap ótýinshe, bıylǵy Joldaýdy aqparattyq qoldaýdyń formatyn birshama ózgertý týraly saıası sheshim qabyldanǵan. «Bul aǵymdaǵy Joldaýdyń strategııalyq kontseptýaldy bolýyna tikeleı baılanysty. Onda memleket damýynyń basymdyqtary, taıaý onjyldyqtaǵy memleket aldynda turǵan naqty tapsyrmalar kórinis tapqan. Aldaǵy mindetterdiń mańyzdylyǵyn eskere otyryp, bul jumysqa eń qabiletti ÚEU-lardy belsendi tartý týraly sheshim qabyldandy», dedi.

QR Prezıdenti Ákimshiligi basshysy orynbasarynyń aıtýyna qaraǵanda, nátıjesinde mańyzdy jaıttardyń taǵdyry sheshiletin bolǵandyqtan Memleket basshysy bul jumystarǵa sáıkes mınıstrliktermen qatar negizgi ÚEU-lardy, qoǵamdyq birlestikterdi, túrli zertteý ortalyqtaryn tartýǵa sheshim qabyldaǵan.