50 protsenttik ústemeaqy: Kúzde muǵalimder attestatsııadan ótedi
ASTANA. QazAqparat - Aǵymdaǵy jyly mektep muǵalimderiniń attestatsııasy ótedi. Sonyń nátıjesi boıynsha jalaqyǵa 50 protsenttik ústemeaqy qosylady, dep xabarlaıdy QazAqparat tilshisi.
QR Bilim jáne ǵylym mınıstri Erlan Saǵadıevtiń aıtýynsha, búginde respýblıka boıynsha 285 myńnan astam muǵalim jumys isteıdi. Olardyń teń jartysy - joǵarǵy jáne birinshi sanattaǵy muǵalimder.
«Qazirgi kezde muǵalimderge naqty talap qoıatyn pedagogtyń kásibı standarty bekitildi. Attestatsııadan ótkizý júıesi talqylanyp jatyr. Attestatsııany kúzde jańa oqý jyly kezinde bastaıtyn bolamyz», - dedi E. Saǵadıev Úkimettiń búgingi otyrysynda.
QazAqparat tilshisine suxbat bergen QR Bilim jáne ǵylym vıtse-mınıstri Asxat Aımaǵambetov attestatsııanyń nátıjesi boıynsha 50 protsenttik ústameaqynyń tólenetinin rastady.
«Qazir attestatsııanyń jańa tártibi bekitilip jatyr. Bul - Elbasynyń tapsyrmasy. Sonyń nátıjesi boıynsha ustazdarǵa 30-50 protsentke deıin ústemeaqy tólenetin bolady», - dep atap kórsetti A.Aımaǵambetov.
