50 paıyzyn memleket ótep otyrǵan ambýlatorııalyq naýqastardy emdeýge arnalǵan dárilik quraldar tegin usynylatyn bolady
ASTANA. 24 qarasha. QazAqparat - «50 paıyzyn memleket ótep otyrǵan ambýlatorııalyq naýqastardy emdeýge arnalǵan dárilik quraldardyń bekitilgen tizimi de kelesi jyldan bastap patsıentterge tegin usynylatyn bolady», dep habarlaıdy Densaýlyq saqtaý mınıstrliginiń baspasóz qyzmeti.
Baspasóz málimetterine qaraǵanda, búgingi tańda respýblıkada patsıentter statsıonarlyq deńgeıde jáne aýrýlardyń kóptegen túrleri boıynsha ambýlatorııalyq deńgeıde qymbat dárilik quraldarmen tegin qamtamasyz etiledi. Qazaqstan - V jáne S gepatıtimen aýyratyndardy aqysyz emmen qamtamasyz etetin jalǵyz el. Aǵymdaǵy jyldan bastap aqysyz dárilik quraldarmen sırek (orfandy) aýrýlarmen aýyratyn balalar qamtamasyz etilýde.
Sondaı-aq Densaýlyq saqtaý mınıstrligi bıýdjet qarajatyn paıdalanýdyń tıimdiligin jáne ádildigin qamtamasyz etý boıynsha da tıisti is-sharalar uıymdastyrýda. Qazirgi tańda dárilik quraldar men medıtsınalyq maqsattaǵy buıymdardyń Biryńǵaı dıstrıbýtsııalyq júıesi memlekettik qarajatty eleýli únemdeýge múmkindik berip otyr.
Sonymen qatar aıta ketetin másele: qazirgi tańda otandyq preparattardyń tutynylý úlesi birneshe ese artty. «Ozyq halyqaralyq tájirıbeni qoldaný, farmatsevtıkalyq sektorǵa ınstıtýttandyrý reformalaryn júrgizý jáne halyqaralyq standarttardy engizý arqasynda qazaqstandyqtardyń densaýlyǵyn jaqsarýǵa baǵyttalǵan densaýlyq saqtaý júıesiniń sapasy men básekege qabilettiligi arta túsedi. Dárilik quraldar aınalymy salasynyń qatysýshylaryn Ulttyq dári-dármek saıasatynyń jobasyn talqylaýǵa keńinen shaqyrý qazirgi qoǵam talaptaryna saı qujatty qalyptastyrýǵa múmkindik beredi. Oǵan qosa, atalǵan joba Densaýlyq saqtaý mınıstrliginiń veb-saıtyna ornalastyrylyp, qoǵamnyń talqysyna usynylatyn bolady», - delingen baspasóz málimetterinde.
