50 mlrd teńgeden asa qaıtarylǵan aktıv Abaı oblysyndaǵy áleýmettik jobalarǵa jumsaldy
ASTANA. KAZINFORM — Abaı oblysynda qaıtarylǵan aktıvter esebinen 26 áleýmettik joba qarjylandyrylyp, MRT ortalyǵy men Oqýshylar saraıy boı kóterdi, dep habarlaıdy oblystyq prokýratýranyń baspasóz qyzmeti.
Abaı oblysynda memleketke qaıtarylǵan aktıvter esebinen qarjylandyrylatyn áleýmettik mańyzy bar jobalardy iske asyrý jalǵasyp jatyr. Óńirde jalpy quny 50 mlrd teńgeden asatyn 26 joba júzege asyrylyp keledi.
— Negizgi nysandardyń biri — Semeı qalasynda salynǵan Arnaýly áleýmettik qyzmetter kórsetý ortalyǵynyń jańa korpýsy. Jobanyń quny 2,6 mlrd teńgeni qurady. Nysannyń paıdalanýǵa berilýi psıhonevrologııalyq aýrýlary bar azamattarǵa arnalǵan oryn tapshylyǵyn joıýǵa jáne arnaýly áleýmettik qyzmetter alý kezegin edáýir qysqartýǵa múmkindik berdi, — delingen Abaı oblysynyń prokýratýrasy taratqan aqparatta.
Aıagóz aýdanynda quny 250 mln teńge bolatyn magnıttik-rezonanstyq tomografııa apparatyn ornalastyrýǵa arnalǵan qosymsha ǵımarattyń qurylysy aıaqtaldy. Jańa dıagnostıkalyq keshen oblystyń birneshe aýdanynyń turǵyndaryn joǵary tehnologııalyq medıtsınalyq kómekpen qamtamasyz etýge múmkindik beredi.
Sonymen qatar oblys ortalyǵynda quny 7,6 mlrd teńgeni quraıtyn, 1 500 orynǵa arnalǵan zamanaýı Oqýshylar saraıy salyndy. Munda balalardyń sportpen, júzýmen, robototehnıkamen, avıatsııalyq modeldeýmen, ІT-tehnologııalarmen jáne qosymsha bilim berýdiń basqa da baǵyttarymen aınalysýyna barlyq qajetti jaǵdaı jasalǵan.
Qazirgi ýaqytta Oqýshylar saraıyna aparatyn qaýipsiz kireberis joldar men jaıaý júrginshiler ınfraqurylymyn qamtamasyz etý máselesi pysyqtalyp jatyr. Sebebi nysan aınalma avtojoldyń mańynda ornalasqan.
Qalǵan áleýmettik mańyzy bar nysandardyń qurylysy men olardyń ýaqtyly iske asyrylýy Abaı oblysy prokýratýrasynyń turaqty baqylaýynda.
Buǵan deıin qaıtarylǵan aktıvter qarjysyna Arqalyq ýnıversıteti tolyq jańartylǵanyn jazǵanbyz.
