50 mlrd teńge: Mal ósiretin sharýalarǵa jeńildetilgen kredıt beriledi
ASTANA. KAZINFORM — Aýyl sharýashylyǵynda sýbsıdııalaýdan jeńildetilgen nesıege kóshý protsesi júrip jatyr. Bul baǵyttaǵy jumys týraly Aýyl sharýashylyǵy mınıstri Aıdarbek Saparov aıtyp berdi.
— Mal sharýashylyǵy salasynyń tolyq qarjylandyrylmaýy erekshe nazar aýdarýdy qajet etedi, bul salaǵa aınalym qarajaty kerek. Osy oraıda mal sharýashylyǵynyń aınalym qarajatyn tolyqtyrýǵa 50 mlrd teńge somasynda jeńildetilgen kredıt júıesi engiziledi. Aınalym qarajatyna arnalǵan qarjylandyrý kóleminiń ulǵaıýyn eskere otyryp, sharýalardyń kommertsııalyq kredıtteri boıynsha stavkany sýbsıdııalaýdy alyp tastaý usynylyp otyr, — dedi Aıdarbek Saparov Úkimet otyrysynan keıin ótken baspasóz máslıhatynda.
Mınıstrdiń aıtýynsha, sýbsıdııalaýdan jeńildetilgen kredıt berýge kóshý jergilikti bıýdjetke túsetin júktemeni azaıtýǵa múmkindik beredi.
— Bıyl 141 ınvestıtsııalyq jobany iske asyrý úshin 200 mlrd. teńge kózdelip otyr, bul ımportqa táýeldilikti azaıtýǵa baǵyttalǵan. Memleket basshysynyń jeńildetilgen kredıtke kóshý boıynsha tapsyrmasyna sáıkes, ınvestıtsııalyq jobalardyń basym baǵyttaryn qamtý arqyly, 2026 jyldan bastap qarjy ınstıtýttaryn tikeleı sýbsıdııalaý mehanızmin keńeıtý boıynsha jumys júrgizilýde, — deıdi vedomstvo basshysy.
Aıta ketsek, bıyl sharýalarǵa 700 mlrd teńge jeńildetilgen kredıt beriledi.