50-ge jýyq otandyq agrokásiporyn «Agrobıznes-2020» baǵdarlamasy aıasynda qarjylyq saýyqtyrý sharasynan ótedi
Jaqynda «Qazagromarketıng» AQ Agroónerkásip kesheniniń sýbektilerin qarjylyq saýyqtyrý jónindegi komıssııanyń ekinshi otyrysy ótken bolatyn.
Otyrys barysynda Komıssııa birqatar qarjy ınstıtýttary, onyń ishinde «QazAgro» holdıngisi quramyndaǵy enshiles kompanııalar men ekinshi deńgeıli bankter usynǵan 55 ótinimdi qarap shyqty.
Atalǵan qarjylyq qoldaý quralyn Soltústik Qazaqstan oblysynan - 12, Aqmola oblysynan - 6, Qostanaı oblysynan - 7, Aqtóbe oblysynan - 4, Almaty oblysynan - 5, Shyǵys qazaqstan oblysynan - 9, Batys Qazaqstan oblysynan - 1, Qaraǵandy oblysy - 5, Pavlodar oblysy - 1, Ońtústik Qazaqstan oblysynan - 2, Astana qalasy - 1 jáne Almaty qalasynan 2 aýylsharýashylyq kásiporny paıdalanýǵa nıet bildirdi.
Komıssııa otyrysynyń qorytyndylary boıynsha 46 ótinim qanaǵattandyryldy, olardyń ortaq qaryzy 15,5 mlrd. teńgeni quraıdy. Qarjylyq saýyqtyrý sharasyna AÓK sýbektileri 2014 jyldyń 1 qańtaryna deıin alynǵan nesıelerimen qatysa alady.
Esterińizge sala keteıik, qarjylyq saýyqtyrý sharasy osymen ekinshi jyl júzege asyrylyp otyr. Byltyr somasy 17,7 mlrd. teńgeni quraıtyn 27 ótinim qanaǵattandyrylǵan bolatyn. Agroónerkásip kesheniniń sýbektilerin qarjylyq saýyqtyrý jónindegi komıssııanyń bıylǵy birinshi otyrysynda ortaq qaryzy 56,7 mlrd. teńgeni quraıtyn 28 ótinimdi qanaǵattandyrý týraly sheshim qabyldandy.
«Memlekettik qoldaýdyń bul baǵyty aıasynda AÓK sýbektileri bıznesti damytý men arnaıy tehnıka men jabdyqtardy satyp alý maqsatynda alǵan teńgedeı nesıelerdiń jyldyq syıaqy mólsherlemesi 7%-ǵa, sheteldik valıýtada alynǵandary boıynsha 5%-ǵa tómendetiledi. Qarjylyq saýyqtyrý aıasynda sonymen qatar qaryzdardy qaıtarý merzimi 9 jylǵa deıin uzartylyp, aıyppuldar men ósimpuldar shegerilip tastalady.
Memlekettik qoldaýdyń bul túrin paıdalaný úshin kásipker nesıe alǵan qarjy ınstıtýtyna ótinish berýi tıis. Qarjy ınstıtýttary retinde ekinshi deńgeıli bankter, banktik qyzmet atqarýǵa lıtsenzııasy bar nesıe uıymdary men AÓK salasyndaǵy nesıelik seriktestikter qarastyrylady», - delingen habarlamada.
