50-ge jýyq sportshy Mońǵolııadaǵy «Búrkit merekesine» qatysty

ASTANA. KAZINFORM — Demalys kúnderi týrıstik keshen «Chıngısıın hýree» alańynda «Búrkit merekesi-2026» 20-shy ret uıymdastyryldy, dep habarlaıdy Montsame.

Merekeniń maqsaty — kóshpendilerdiń salt-dástúrleri men erekshe mádenıetin nasıhattaý, tanystyrý jáne ony jas urpaqqa jetkizý.

Іs-sharaǵa Baıan-Ólgıı, Týv, Selenge aımaqtarynan 30-dan astam búrkitshi qatyssa, Qazaqstan Respýblıkasy, Qyrǵyz Respýblıkasy, Ispanııa, Majarstan jáne Reseıden 16 sportshy bardy.

«Búrkit merekesi-2026» jarystar men konkýrstar túrinde ótkiziledi. Qatysýshylar ulttyq kıim kıip, baptalǵan búrkitterdi qoldaryna qondyrady jáne ańshylyqqa úıretilgen attarǵa minip jarysady. Mereke barysynda eń úzdik ulttyq kıimder, attar men búrkitke arnalǵan qural-jabdyqtar irikteledi. Baǵalaý krıterııleri — dástúrlerdi saqtaý jáne kıim úlgisiniń stıli.

Merekede qazaq ártisteri óner kórsetti, kıim men aksessýarlar satylymǵa qoıyldy, ulttyq taǵamdar usynyldy. Qatysýshylar qazaq kıiz úıine kirip, kóshpendilerdiń erekshe salt-dástúrleri men turmysymen jaqynyraq tanysý múmkindigine ıe boldy.

Іs-sharany astananyń Týrızm departamenti «Chıngısıın hýree» týrıstik keshenimen birlese uıymdastyryp, Mádenıet, sport, týrızm jáne jastar isteri mınıstrligi jáne Baıan-Ólgıı aımaǵynyń Mádenıet departamenti qoldaý kórsetti.

Qyran qustardy baptaý jáne olarmen ańshylyq jasaý dástúri, sonyń ishinde búrkitpen ań aýlaý dástúri, Ortalyq Azııa kóshpendileri tarapynan 6000 jyl boıy saqtalǵan. Mońǵolııa bul murany saqtap qalǵan el retinde, 2010 jyly ıÝNESKO-nyń adamzattyń materıaldyq emes mádenı murasynyń ókildik tizimine resmı engizgen.

Osyǵan deıin Mońǵolııada «Myń túıe merekesi — 2026» festıvali ótkenin jazǵan bolatynbyz.