50 ǵasyrlyq shejire: Preambýla qalaı ózgerdi?

ASTANA. KAZINFORM — Senat depýtaty Altynbek Nuhuly Konstıtýtsııanyń kirispe bólimindegi árbir sózdiń tarıhı mańyzyna toqtaldy.

Onyń aıtýynsha, jumys toby qujattyń mátinin muqııat pysyqtap, sóz sanyn 86-dan 89-ǵa deıin ulǵaıtqan. Eń basty túzetý — tarıhtyń tereńdigine qatysty.

— Buryn «myńjyldyq tarıhy bar» dep jazylsa, qazirgi naqtylanǵan nusqada «myńdaǵan jyldyq tarıhy bar» dep berildi. Bul — bizdiń 50 ǵasyrlyq shejiremizdiń zańdyq aıǵaǵy. Akademık Orazaq Smaǵulov bastaǵan ǵalymdar qazaq eliniń elý ǵasyrlyq tarıhyn tolyq dáleldep shyqty. Bul — ulttyq maqtanyshymyz, — dedi senator.

Sonymen qatar, Altynbek Nuhuly Japonııa, Fınlıandııa jáne Germanııa tájirıbesine súıene otyryp, bilim, ǵylym jáne tól mádenıetti Ata Zań deńgeıinde ulyqtaý memlekettiń rýhanı jáne ekonomıkalyq damýynyń kepili ekenin atap ótti.

Aıta keteıik, alǵash ret «Ata Zań» sózi Konstıtýtsııanyń resmı mátinine engiziletinin jazǵan edik.