50 elden 80 myń patsıent: Qazaqstanda medıtsınalyq týrızm damyp keledi

ASTANA. KAZINFORM — Ótken jyly qazaqstandyq klınıkalar 50 elden kelgen shamamen 80 myń sheteldik patsıentti qabyldady. Qazaqstandyq medıtsınalyq týrızm assotsıatsııasynyń boljamynsha, shetelden emdelýge keletin adamdar sany jylyna 300 myńǵa deıin ósýi múmkin. Bul týraly Densaýlyq saqtoaý mıngıstrligi málim etti. 

— Qazaqstandaǵy medıtsınalyq klasterge degen qyzyǵýshylyq, negizinen, emdeýdiń salystyrmaly túrde tómen qunymen baılanysty, dep atap ótti Densaýlyq saqtaý mınıstri Aqmaral Álnazarova.

Dıagnostıkalyq emsharalar men hırýrgııalyq operatsııalardyń quny AQSh nemese Eýropamen salystyrǵanda 5–10 ese arzan bolýy múmkin.

— Barlyq klınıkalyq emdeý hattamalary eýropalyq standarttarǵa sáıkes keledi jáne Qazaqstanda on jyldan astam ýaqyt boıy engizilip kele jatqan medıtsınalyq tehnologııalardy baǵalaý arqyly qaralady, — dedi mınıstr.

Elimizdegi toǵyz klınıka Joint Commission International (JCI) akkredıtatsııasyn alǵan, bul patsıentterdiń qaýipsizdigi men medıtsınalyq qyzmet sapasynyń álemdik «altyn standarty» bolyp esepteledi.

Eýropa elderinen kelgen patsıentterdiń arasynda eń kóp suranysqa ıe baǵyttardyń biri — ekstrakorporaldyq uryqtandyrý (EKU), onyń sebebi qoljetimdi quny men joǵary sapaly qyzmetterde. Sonymen qatar, sheteldik patsıentter Qazaqstanǵa joǵary tehnologııaly stomatologııalyq kómek alý úshin de keledi.

Buǵan deıin Qazaqstan álemdik medıtsınanyń jańa tartylys ortalyǵyna aınalyp kele jatqanyn jazǵan edik.

Medıtsınalyq týrızmdi damytý jáne salalar arasyndaǵy yntymaqtastyqty arttyrý maqsatynda Týrızm jáne sport mınıstrligi men Densaýlyq saqtaý mınıstrligi arasynda ózara yntymaqtastyq týraly memorandýmǵa qol qoıǵan bolatyn.