50-den astam alaıaqtyq jaıtyna qatysy bar áıel alty jylǵa sottaldy - Túrkistan oblysy
Oblystyq PD baspasóz qyzmetiniń málimetinshe, kúdikti áıeldi ustaýǵa jergilikti turǵynnyń aryzy negiz bolǵan. Onyń aıtýynsha, jaqyn tanys emes áıel ulyn múgedektikke shyǵaryp berý úshin 100 myń teńge aqshasyn alǵan. Alaıda aıtqan ýádesinde turmaı, izin sýytqan. Seziktini qolǵa túsirý úshin tájirıbeli polıtsııa qyzmetkerlerinen jedel-tergeý toby qurylyp, alaıaqtyń jeke tulǵasyn anyqtaǵan. Ol jyl basynan beri birneshe ret alaıaqtyq jasap, qolhatta júrgen Saryaǵash aýdanynyń turǵyny bolyp shyqty.
Tártip saqshylary bul áıeldi Shymkent qalasyndaǵy jaldamaly páterlerdiń birinde jasyrynyp júrgen jerinen ustady. Tergeý barysynda 33 jastaǵy kúdiktiniń sońǵy bir aıdyń ishinde «qolhatta» júrgenine qaramastan, taǵy 7 adamdy aldap ketkeni anyqtaldy. Ol turǵyndarǵa ózin memlekettik qyzmetkermin dep tanystyryp, qysqa merzim ishinde múgedektikke shyǵaryp beremin dep aldap soqqan. Sóıtip, 51 alaıaqtyq qylmysyn jasaǵan. Ol sot úkimimen 6 jylǵa bas bostandyǵynan aıyryldy.