50-den asqan erler ınsýlt pen ınfarktqa qarsy tegin skrınıngten óte alady

ASTANA. KAZINFORM – Bıyldan bastap elimizde skrınıngtiń jańa 2 túri engizildi. Bul týraly Májilistegi Úkimet saǵatynda Densaýlyq saqtaý mınıstri Aqmaral Álnazarova aıtyp berdi.

− Bıyldan bastap skrınıngtiń jańa 2 túri engizildi: júktilikke daıyndyq; 50 jastan asqan erlerde ınsýlt pen ınfarktty aldyn alý maqsatyndaǵy (predgravıdaraldy daıyndyq, moıyn arterııalarynyń ýltradybystyq zertteýi) tekserýler, - dedi Densaýlyq saqtaý mınıstri.

Sondaı-aq, osy jyldan bastap saqtandyrylmaǵan azamattardyń onkoskrınıngten tegin ótý múmkindigi bar.

Densaýlyq saqtaý mınıstrligi osy máselelerdi qarastyratyn normany Memleket basshysynyń tapsyrmasyn oryndaý aıasynda ázirlengen zań jobasyna engizgen.

Buǵan deıin Aqmaral Álnazarova medıtsınalyq saqtandyrýǵa qatysty jańa zańnamada qandaı ózgerister bolatynyn aıtyp berdi.

Onda tegin medıtsınalyq kómek kólemi paketinde áleýmettik mańyzy bar aýrýlar boıynsha kómek 2-den 8-ge deıin ulǵaıtylyp, saqtandyrý mártebesine qaramastan tegin kórsetiletin bolady.

Qyzmetterdiń qaıtalanýyn boldyrmaý, azamattardyń áleýmettik mártebesin esepke alý jáne saqtandyrý mártebesine qaramastan bazalyq kómekke kepildik berý úshin biryńǵaı paketter qalyptastyrý kózdelgen.