Fýtbol: 50 Cent, Nelly, Diplo ÁCh-2026 kontsertteriniń hedlaınerleri bolady
ASTANA. KAZINFORM – Sports Illustrated fýtboldan álem chempıonaty kezinde aýqymdy kontsertter men VIP-keshter serııasyn uıymdastyrady. AQSh-tyń tórt qalasynda ótetin is-sharalardyń basty juldyzdary retinde 50 Cent, Nelly, The Chainsmokers, Diplo jáne Gordo óner kórsetedi, dep habarlaıdy Kazinform Associated Press agenttigine silteme jasap.
Sports Illustrated fýtboldan álem chempıonatyna oraı uıymdastyrylatyn SI Beyond the Pitch atty jańa mýzykalyq jobany jarııalady. Kontsertter men VIP-keshter Los-Andjeles, Dallas, Maıamı jáne Nıý-Iork qalalarynda ótedi.
Jobanyń ashylýy 12 maýsymda Los-Andjelestegi Hollywood Palladium kontsert zalynda ótedi. Bul keshte Nelly óner kórsetedi. Keıin serııa Dallasta jalǵasady – 20 maýsymda SILO klýbynda Gordo shoýy uıymdastyrylady.
26 maýsymda Maıamıdegi DAER alańynda The Chainsmokers dýeti sahnaǵa shyǵady. Al fınaldyq kesh 18 shildede Nıý-Iorktegi Cipriani Wall Street ǵımaratynda ótedi. Onda 50 Cent pen Diplo óner kórsetedi.
Djo Zılbertsveıg aldaǵy álem chempıonatyn «bir býynnyń basty sporttyq oqıǵasy» dep atady. Onyń aıtýynsha, uıymdastyrýshylar álemdik fýtbol týrnıriniń atmosferasyn túngi shoý men jankúıerlerge arnalǵan VIP-oıyn-saýyqpen ushtastyrýdy kózdep otyr.
Jańa joba Sports Illustrated-tyń Super Bowl demalysy kezinde ótken SI The Party keshiniń jetistiginen keıin iske qosylyp otyr. Ol keshte The Chainsmokers pen Ludacris óner kórsetken. Qonaqtar qatarynda Justin Bieber, Travis Kelce jáne Ciara bolǵan.
Sonymen qatar álem chempıonatynda birden úsh ashylý saltanaty ótetini belgili boldy. Mundaı sheshimdi FIFA týrnırdi qabyldaıtyn elderdiń teń mártebesin kórsetý úshin qabyldaǵan.
The Athletic málimetinshe, ár eldegi alǵashqy match aldynda jergilikti juldyzdardyń qatysýymen arnaıy shoý uıymdastyrylady. AQSh-ta Katy Perry, Kanadada Michael Buble, al Meksıkada Mana óner kórsetedi.
Eske salsaq, buǵan deıin Shakıra 2026 jylǵy fýtboldan álem chempıonatynyń resmı ánin tanystyrdy. Dai Dai atty trek nıgerııalyq oryndaýshy Burna Boymen birge jazylǵan.
