50 adam áýejaı úshin bolǵan urysta qaza tapty
ASTANA. QazAqparat -Lıvııa astanasynyń áýejaıyn baqylaý úshin talasqan toptardyń qarýly qaqtyǵysynan bir apta ishinde barlyǵy 50-ge jýyq adam qaza taýyp, 120 adam jaraqattandy. Bul týraly Lıvııa Densaýlyq saqtaý mınıstrligi málimdedi, dep habarlady «ITAR-TASS».
Osyǵan deıin 18 shildede bitimge kelgenderdiń janjaly qaıta órship, jeksenbi kúni áýejaı janyndaǵy Kasr ben-Ǵashır aýdanynda atys bastalǵan. Áýejaıǵa ıelik etý úshin general Halıf Haftardy qoldaıtyn "Zıntandyq brıgada" dep atalatyn qarýly top pen dinshil ekstremıstik top talasyp keledi.
Qarýly qaqtyǵys kesirinen ondaǵy ushaqtarǵa zaqym kelgen. Sonymen qatar, baqylaý-dıspetcherlik pýnkti men kire beris jol jáne ózge de sol mańdaǵy nysandar zardap shekken.
