5 jylǵa arnalǵan jastar saıasatynyń tujyrymdamasy bekitilmek
Tujyrymdama 6 bólim jáne 7 taraýdan turady. Onda qazirgi jastar arasyndaǵy ózekti máseleler, olarǵa áleýmettik jelilerdiń áseri, óskeleń urpaqtyń densaýlyǵy men jastarǵa patrıottyq tárbıe berý baǵytyndaǵy taldaýlar men usynystar qamtylǵan.
«Jastar saıasatynyń tujyrymdamasy egemendi Qazaqstannyń jańa syn-qaterleri turǵysynan jastardyń ózin-ózi damytýǵa qolaıly jaǵdaı jasaýǵa baǵyttalǵan protsesterdi qamtıdy. Sondaı-aq jastardy qoǵamǵa áleýmettik jáne ekonomıkalyq turǵydan ıntegratsııalaý salasyndaǵy negizgi mindetter men basymdyqtardy aıqyndaıdy. Qazaqstannyń ulttyq ekonomıkasynyń halyqaralyq arenadaǵy básekege qabilettiligi is júzinde adamı kapıtal turǵysynan respýblıkanyń bolashaǵyna salynǵan strategııalyq ınvestıtsııalar bolyp esepteletin jastardyń damý jaǵdaıyna tikeleı baılanysty», - delingen qujatta.
Mınıstrlik aqparaty boıynsha tujyrymdamany bekitý sapaly jastar saıasatyn qalyptastyrýǵa múmkindik bermek.
«Jobany qabyldaý jastar saıasaty salasyndaǵy is-qımyldardyń biryńǵaı algorıtmin qurýǵa, quqyqtyq alańda bekitilgen jastar áleýetin iske asyrýdy yntalandyrý tetikteri men quraldaryn qaıta qaraýǵa jáne ózektendirýge múmkindik beredi», - dep túsindirme berilgen tujyrymdaǵa.
Vedomstvo boljamynsha, tujyrymdamany iske asyrý nátıjesinde 2027 jylǵa qaraı kásipkerlikti damytý jobalaryna qatysatyn jastardyń úlesi 10%-ǵa deıin artpaq. Buǵan qosa, NEET sanatyndaǵy jastardyń sanyn 5,8%-ǵa deıin tómendetý josparlanǵan.
Qujatta qamtylǵan usynystar men josparlar týraly myna silteme arqyly ótip, tolyq tanysýǵa bolady.
2023-2027 jyldarǵa arnalǵan jastar saıasatynyń tujyrymdamasy 26 qańtarǵa deıin kópshilik talqylaýda bolady. Keıin ol qol qoıý úshin Úkimet basshysyna joldanady.
