5 jylda jumyssyz 130 myń adam eńbek naryǵyna qajetti daǵdy alady – Asqar Mamın

NUR-SULTAN. QazAqparat – Aldaǵy 5 jyldyń ishinde jumyssyz júrgen 130 myń adam eńbek naryǵynda qajetti daǵdylardy onlaın formatta oqıdy. Bul týraly Májilistegi «Nur Otan» partııasy parlamenttik fraktsııasynyń keńeıtilgen otyrysynda Úkimet basshysy Asqar Mamın aıtty, dep habarlaıdy QazAqparat tilshisi.

«Halyqtyń jumyspen qamtylýyn saqtaý jáne arttyrý jóninde keshendi sharalar júzege asyrylady. Nátıjesinde jumyssyzdyq deńgeıi 4,7 paıyzdy quraıdy. 2021 jáne 2023 jyldardyń aralyǵynda bul kórsetkishtiń máni 4,9 paıyz deńgeıinde qamtamasyz etilip, odan ári maqsatty ındıkatorǵa deıin qysqartylady», - dedi Úkimet basshysy «Nur Otan» partııasynyń «Ózgerister joly: ár azamatqa laıyqty ómir!» Saılaý baǵdarlamasyn oryndaýdyń Jol kartasyn talqylaý barysynda.

Onyń atap ótýinshe, aldaǵy 5 jyldyń ishinde jumyssyz júrgen 130 myń adam eńbek naryǵynda qajetti daǵdylardy onlaın formatta oqıdy. 2021 jyly mundaı múmkindik 5 myń adamǵa berilip, jyl saıyn onyń qatary keńeıip, 2023 jylǵa qaraı 35 myń adamǵa jetkiziledi Jumyspen qamtýydyń belsendi formasymen jyl saıyn keminde 700 myń adam qamtylady.

«ІT-salasynda shamamen 100 myń, týrızm salasynda 170 myń jańa jumys orny ashylyp, aýyl sharýashylyǵynda 500 myń adam jumyspen qamtylady», - dedi Asqar Mamın.