5 jylda muraǵat salasyna myńǵa jýyq maman qajet bolady

NUR-SULTAN. QazAqparat - Aldaǵy 5 jylda muraǵat isi salasyna 1 myńǵa jýyq bilikti maman qajet bolady. Bul jaıynda Senat depýtattarynyń resmı saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

«Muraǵat salasynda mamandar daıyndaý kadr qajettiliginiń qysqa merzimdi jáne ortasha qysqa merzimdi boljamy negizinde qalyptasatyn memlekettik bilim berý tapsyrysy aıasynda júrgiziledi. Boljamdarǵa sáıkes, taıaý 5 jyldyń ishinde salaǵa joǵary bilimi bar 945 maman qajet bolady», - dedi Asqar Mamın.

Úkimet basshysynyń atap ótýinshe, elimizdiń Bilim jáne ǵylym mınıstrligi atalǵan qajettilikti qamtamasyz etý úshin 2020 jyly muraǵat mamandary úshin bakalavrıat jáne magıstratýra baǵdarlamasy boıynsha 55 bilim berý grantyn qarastyryǵan. Onyń 35-i bakalavrıatqa, al 20-sy magıstratýraǵa bólinip otyr.

«Qalǵan qajettilik aralas mamandyq túlekterin, birinshi kezekte fılologtardy tartý esebinen tolyqtyrylatyn bolady. Tolyqtaı alǵanda, 2019-2020 oqý jylynda joǵary oqý oryndarynda atalǵan mamandyq boıynsha 82 stýdent (bakalavrıat - 73, magıstratýra - 9) bilim aldy», - dedi Premer-Mınıstr.