5 jylda 75 kınony qazaqshalaımyz – Ashat Oralov

ASTANA. QazAqparat – Mádenıet jáne sport mınıstri Ashat Oralov Úkimet kýlýarynda bıyl nege sheteldik fılmderdi qazaqshalaý jumysy toqtap qalǵanyn túsindirdi, dep habarlaıdy QazAqparat tilshisi.

«Dýblıaj máselesin biz qarastyrdyq. Bilesizder ǵoı, bir-eki aı buryn mádenıet salasyn damytýdyń 7 jyldyq tujyrymdamasy bekitildi. Byltyrdyń ózinde 3, 4, 5-ke deıin kınonyń dýblıajy uıymdastyrylǵan bolatyn. Biraq biz tujyrymdamaǵa basqa kórsetkishter engizdik. Endigi kezekte jyl saıyn qazaqsha dýblıajdalatyn fılmderdiń sanyn kem degende 3 ese kóbeıtemiz. ıAǵnı, jyl saıyn 15 kınonyń dýblıajyn ótkizemiz.

Bıyl da 15-ke jetkizemiz degen jospar bar. Biraq tujyrymdama bekitilgenine eki aı boldy. Konkýrs protsedýralary bar. Búkil jumys zańǵa sáıkes uıymdastyrylyp jatyr. Shynyn aıtqanda, 5 jyldyń ishinde 75 kınonyń dýblıajyn ótkizemiz degen jospar bar. Keıingi 7 jylda ondaı kórsetkish bolǵan joq. Buǵan arnaıy Úkimet qaýlysy shyqty. Qazir konkýrstyq protsedýralar ótedi. Jyl sońyna deıin qolǵa alyp, jumystardy úılestiremiz. Kelesi jyldan bastap kem degende eń myqty degen 15 kınonyń dýblıajy uıymdastyrylady», - dedi ol.

Ashat Oralovtyń aıtýynsha, jylyna 3-5 kınony dýblıajdaý jetkilikti emes.

«Óıtkeni qazir halyqtyń suraýy bar. Byltyrdyń ózin qaraıtyn bolsaq, 3-4 kınonyń ózi qanshama suranysqa ıe boldy?! Sondyqtan muny sanyn 5 esege deıin kóbeıtý týraly sheshim qabyldadyq», - dedi mınıstr.