5 jylda 50 mektep: Altaı Kólginov qurylys nysandaryn tekserdi
NUR-SULTAN. QazAqparat - Elordada mektep sanyn arttyrýdy jalǵastyramyz. Bul týraly qala ákimi Altaı Kólginov málim etti, dep habarlaıdy QazAqparat.
Nur-Sultan basshysynyń aıtýynsha, mektepter qurylysyna jeke qarajat ta tartylatyn bolady.
«Birqatar mekteptiń qurylys barysymen tanystym. Olar Uly Dala dańǵyly men Turan dańǵylynyń qıylysynda, sondaı-aq E103 kóshesi men Turan dańǵylynyń qıylysynda ornalasqan. Alpamys school men Tamos Space school eki aýysymda 4 myń oqýshy ornyn qurýǵa múmkindik beredi.
Oqý oryndarynyń qurylysy elordanyń barlyq aýdandarynda, sonyń ishinde eldi mekenderde júrgizilip jatyr. Ótken jyldarmen salystyrǵanda bıyl kóbirek mektep salamyz. Úlken kólemdegi 16 mektep salynbaq. Olar bıyl 40 myńnan astam oqýshy qabyldaýǵa múmkindik beredi. Ótken jylmen salystyrǵanda oqýshy oryndarynyń sany 2 ese artyq bolsa, 2019 jylmen salystyrǵanda 4 eseden astam ulǵaıady», - dep jazdy A.Kólginov Instagram-da.
Málim etilgendeı, keshendi jospar aıasynda 5 jyldyń ishinde 50-ge jýyq memlekettik mektep salý josparlanǵan. Sonymen qatar ınvestıtsııalyq keńesterde 30-dan astam jekemenshik mekteptiń qurylysy qoldaý tapty.
«Bul sharalar úsh aýysymda oqytatyn, shamadan tys júkteme artylǵan mektepterdiń sanyn azaıtýǵa múmkindik beredi. Osylaısha oqýshylar men muǵalimderge qolaıly jaǵdaı jasalmaq», - dedi qala basshysy.
