5 jyl ishinde Zashaǵan kentinde 40-tan astam turǵyn úı salý kózdelýde - Oral
ORAL. QazAqparat - Oralǵa qarasty Zashaǵan kentindegi jańa shaǵynaýdanda 2020 jylǵa deıin quny 35 mlrd teńge turatyn jalpy alańy 280 myń sharshy metr 40-tan astam turǵyn úıdi salyp bitirý kózdelýde.
Qala ákimi Altaı Kólginovtiń aıtýynsha, bul - 5 myńdaı páter, ol 15 myńnan astam qala turǵynyn baspanamen qamtýǵa múmkindik beredi.
Qazirgi kezde atalǵan aýdanda turǵyn úı qurylysy qyzý júrgizilýde. Bıyl munda memlekettik baǵdarlamalarǵa sáıkes quny 10,6 mlrd teńge turatyn jalpy alańy 90 myń sharshy metr 14 úı iske qosylmaq. Bul rekordtyq kórsetkish deýge bolady. Sonyń ishinde «Nurly jol» baǵdarlamasyna sáıkes 9 úı salynyp, 1 004 páter kezekte turǵandarǵa beriledi. Barlyǵy 1 562 páter 5 myńnan astam qala turǵynyn baspanamen qamtymaq.
Bul jerde atap ketetin jaıt, qurylys materıaldarynyń basym bóligi jergilikti óndirýshilerden alynady. Mysaly, Zashaǵan kentindegi 300 adam jumys jasaıtyn kirpish zaýyty 5 mıllıondaı dana kirpishpen qamtıdy. Jergilikti temirbeton buıymdaryn shyǵaratyn zaýyttar 393 tekshe metr buıym jetkize alady. «Bolashaq-T» JShS men «SV plıýs» JShS úı qurylysy kombınattarynan 30 myń sharshy metr ónim jetkizilmek.
«Nurly jol» baǵdarlamasy aıasynda turǵyn úı qurylysyna barlyǵy 1 472 jumysshy tartylyp, 290 jańa jumys orny ashyldy.
Aıta keteıik, ótken jyly Oralda barlyq qarjy kózderi esebinen jalpy alańy 157 myń sharshy metr 1 560 páter paıdalanýǵa berildi, bul - óńirde boı kótergen turǵyn úıdiń 60 paıyzy. Sonyń ishinde memleket esebinen 36 myń sharshy metr, jeke qarajattarǵa 88 myń sharshy metr, kásiporyndar qarjysyna 20 myń sharshy metr úı salyndy.
2015 jyly memlekettik baǵdarlamalar aıasynda jalpy alańy 36,1 myń sharshy metr 5 úı (586 páter, ekeýi kezekte turǵandar, úsheýi turǵyn úı qurylys jınaq banki salymshylary úshin) boı kóterdi.
Zashaǵan kentindegi jańa shaǵynaýdandy ıgerý bastalǵannan beri quny 8,7 mlrd teńge turatyn jalpy alańy 92 myń sharshy metr 16 úı (1 573 páter) paıdalanýǵa berildi. Sonyń ishinde 4 úıge (360 páter) jas otbasylar, 6 úıge (565 páter) kezekte turǵandar, 6 úıge (648 páter) turǵyn úı qurylys jınaq banki salymshylary kirdi.
