5 jylda jumys kúshi tapshy óńirlerden 103 myń adam kóship ketken
ASTANA. KAZINFORM — Jumys kúshi tapshy óńirlerge azamattardy 1 mlrd-tan astam teńgege jalǵan qujattar negizinde kóshirý faktileri anyqtaldy. Bul týraly Eńbek jáne halyqty áleýmettik qorǵaý mınıstrliginiń keńeıtilgen alqa májilisinde vedomstvo basshysy Svetlana Jaqypova aıtty.
Onyń atap ótýinshe, 2024 jyldyń qorytyndysynda kóshi-qon saıasaty tujyrymdamasynyń nysanaly ındıkatorlaryna tutastaı alǵanda qol jetkizildi. Sonymen birge kóshi-qon protsesteri halyq sanyna áser etedi. Sońǵy 5 jylda halyqtyń eń kóp azaıýy Soltústik Qazaqstan jáne Qostanaı oblystarynda baıqalady.
— Kóp jaǵdaıda kóshi-qon óńirlerdiń ınfraqurylym sapasynyń tómendeýine, tirshilikti qamtamasyz etý jaǵdaılaryna, turaqty jumyspen qamtý múmkindikteriniń joqtyǵyna jáne basqalaryna baılanysty májbúrli sıpatta bolady. Jumys kúshi tapshy óńirlerden 5 jyl ishinde halyqtyń birjolata kóship ketýi 103,1 myń adamdy qurady. Bul rette basqarylatyn aǵyn esebinen ketken halyqtyń 31 paıyzy óteldi, — dedi ol.
Svetlana Jaqypovanyń aıtýynsha, qonys aýdarýdy yntalandyrý úshin ekonomıkalyq utqyrlyq sertıfıkaty engizildi. Qonys aýdarýshylarǵa bes jyl merzimge jerdi ýaqytsha paıdalanýǵa aýyl sharýashylyǵy maqsatyndaǵy jer ýchaskelerin alýda jeńildikter berildi. Qonys aýdarýshylarǵa tólenetin sýbsıdııalar bankter men ózge de qarjy uıymdary aldyndaǵy nesıelik mindettemeler boıynsha óndirip alýdan qorǵalǵan. 2024 jyldan bastap Eńbek mobıldiligi ortalyqtary qonys aýdarýshylar men qandastardyń otbasylaryn jergilikti qoǵamdastyqqa biriktirý úshin súıemeldeýdi júzege asyrady. 25 jańa beıimdeý jáne ıntegratsııalyq qyzmetter engizildi.
— Sonymen birge ótken jyly qonystandyrýdyń barlyq óńirinde prokýratýra 1 mlrd-tan astam teńgege azamattardy jalǵan qujattar negizinde kóshirý faktilerin anyqtady. Osyǵan baılanysty biz jyljymaıtyn múlikpen jalǵan mámilelerdi boldyrmaý úshin erikti qonys aýdarý kezinde qujattardy usynýǵa qoıylatyn talaptardy kúsheıttik. Qazirgi ýaqytta Parlament Senatynyń janynan jumys toby quryldy. Onyń aıasynda erikti qonys aýdarý tetigin jetildirý, kóshi-qon protsesterin retteý salasyndaǵy memlekettik baqylaýdy kúsheıtý boıynsha usynymdar pysyqtalýda, — dedi mınıstr.
Eske sala keteıik, buǵan deıin soltústikke qonys aýdarýda jymqyrylǵan qarjyǵa qatysty Eńbek jáne halyqty áleýmettik qorǵaý mınıstrligi málimdeme jasaǵanyn jazǵan bolatynbyz.