5 jylda 1 mln adamǵa JI daǵdylaryn úıretemiz — Tsıfrlyq damý mınıstri
ASTANA. KAZINFORM — Elimizde 5 jyl ishinde stýdentter, memlekettik jáne kvazımemlekettik sektor qyzmetshiler túrli baǵdarlamalar arqyly JI daǵdylaryn úırenedi. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev aıtty.
— Qazaqstanda «JI-qozǵalys» bastamasyn iske asyrý jalǵasyp jatyr. Bes jyl ishinde biz 1 mıllıon azamatqa jasandy ıntellekt daǵdylaryn úıretemiz. Oqýshylar men stýdentter úshin TUMO, Tomorrow School, AI Sana jáne AI OLYMP baǵdarlamalary, sondaı-aq Day of AI bastamasy engizilip jatyr. Memlekettik qyzmetshiler úshin AI Qyzmet baǵdarlamasy jumys isteıdi, kvazımemlekettik sektorda AI Corporate iske qosylady, al aýqymdy aýdıtorııa úshin Tech Orda jáne Qazqoders jáne Yandex kýrstaryn qosa alǵanda, onlaın-kýrstar men akseleratsııalyq baǵdarlamalar qoljetimdi, — dedi ol Úkimet otyrysynda jasaǵan baıandamasynda.
Sondaı-aq ol Alem.ai JI ortalyǵy kelesi aıda ashylatynyn aıtty.
— Halyqaralyq alem.ai JI ortalyǵyn qurýǵa erekshe kóńil bólinedi, ol bilim, ǵylym, bıznes jáne memlekettik tehnologııalardy biriktiredi. Onyń qabattary ashyq keńistikterge, oqýshylar men stýdentterdi oqytýǵa, startaptar men akseleratsııaǵa, ǵylymı zertteýlerge jáne memlekettik basqarýdaǵy tsıfrlyq sheshimderge arnalǵan ortalyqqa bólinetin bolady. Ortalyqtyń ashylýy bıyl qazan aıynda Digital Bridge aıasynda ótedi, — dedi mınıstr.
Aıta keteıik, kúni keshe Memleket basshysy Jolaýda jappaı tsıfrlandyrý jáne jasandy ıntellekt tehnologııasyn barynsha engizý arqyly ekonomıkany jańǵyrtýdy tapsyrǵan edi.