5 jyl úzilisten keıin kerlıngke qaıta oraldym – Abylaıhan Júzbaı

HARBIN. KAZINFORM – Kerlıngten Qazaqstan erler quramasynyń kapıtany Abylaıhan Júzbaı Kazinform tilshisine eksklıýzıv suhbat berip, Qazaqstan quramasy jáne sporttyq mansaby týraly aıtyp berdi. 

Kapıtan komanda quramy qysqy Azııa oıyndary aldynda jasaqtalyp, alǵash ret birge halqaralyq jarysqa qatysyp jatqanyn atap ótti. 

– Qurama sapyndaǵy bir sportshymen birge Kanadada ótken qurlyqtyq chempıonatqa qatysyp keldim. Al qalǵan eki sportshy alǵash ret osyndaı halqaralyq deńgeıdegi jarys jolyna shyǵyp otyr. Komanda jańadan jasaqtalǵan soń bizge kóbirek birge oınaý kerek ekenin aıta ketý kerek. Osyǵan deıin, Shveıtsarııadaǵy jarystada basqa sportshylarmen óner kórsettik, - dedi Abylaıhan Júzbaı.

Sonymen qatar ol ne úshin sportqa 5 jyl úzilisten keıin qaıta oralǵanyn túsindirdi.

– Kerlıng sportyn 2013 jyly bastap, 2020 jyldary sporttyq mansabymdy aıaqtadym. Qysqy Azıada aldynda ulttyq quramaǵa kapıtan bolý týraly usynysty qabyldap, qaıta keldim. Bul sport túrine degen adaldyǵym meni 5 jyldan keıin qaıta jarys jolyna shyǵardy, - deıdi Abylaıhan. 

Qurama kapıtany atalǵan sport túriniń qazaqstandaǵy bolashaǵyn joǵary baǵalady. 

– Bul sporttyń elimizdegi bolashaǵy jarqyn. Jastardyń da qyzyǵýshylyǵy baıqalady. Biraq bizdegi keı komandalarda jasy úlken sportshylar da júr. Sondyqtan, kerlıngti elimizde damytý kerek. Halqaralyq jarystarda úzdik nátıje kórsetip, elimizdiń kók týyn jelbiretsek degen maqsatymyz bar, - dedi Abylaıhan Júzbaı.

Aıta keteıik, kerlıngten Qazaqstan erler quramasy qysqy Azııa oıyndarynyń alǵashqy oıynynda Qytaılyq Taıbeıdi 10:5 esebimen jeńdi. Ekinshi matchta otandastarymyz 1:4 esebimen Fılıppınen jeńilip qaldy. 

Kerlıngten Qazaqstan quramasynyń sportshysy Ermek Musaınov oıynnan keıin Kazinform tilshisine eksklıýzıv suhbat berdi.