5 jyl boıy izdeýde júrgen: adam aǵzasyn saýdalaǵan kúdikti Polshadan ekstradıtsııalandy

ASTANA. KAZINFORM — Bas prokýratýra men Interpoldyń Ulttyq ortalyq bıýrosynyń qyzmetkerleri Qazaqstan Syrtqy ister mınıstrliginiń kómegimen Polshadan adam aǵzalaryn satqany úshin izdeýde júrgen Ýkraına azamatyn ekstradıtsııalady. Bul týraly Bas prokýratýra málim etti. 

Ol 2017-2018 jyldar aralyǵynda transulttyq uıymdasqan qylmystyq toptyń múshesi bola otyryp, adam aǵzalaryn zańsyz satyp alý-satýmen aınalysqan degen kúdikke ilindi.

— Onyń róli donorlar men retsıpıentter izdeý jáne olardyń arasyndaǵy kezdesýlerdi uıymdastyrý, organdardy satyp alý-satý men transplantatsııalaý operatsııalaryn qupııa ustaý jáne uıymdastyrýshylyq qoldaýdy qamtamasyz etý boldy, — delingen habarlamada.

Jalpy alǵanda, qylmystyq top músheleri Qazaqstan aýmaǵynda jáne basqa elderde tiri adamdardyń organdarymen 56 zańsyz mámile jasap, ıaǵnı Qazaqstan Respýblıkasynyń densaýlyq saqtaý uıymdarynda satyp alý-satý jáne keıinnen transplantatsııalaýdy uıymdastyrǵan.

— Qylmys jasaǵannan keıin kúdikti qylmystyq qýdalaý organdarynan jasyrynyp, 5 jyl boıy halyqaralyq izdeýde bolǵan. Aǵymdaǵy jyldyń naýryz aıynda ol Polsha shekarasyn kesip ótpek bolǵan kezde ustalyp, Qazaqstan Respýblıkasy Bas prokýratýrasynyń suraýy boıynsha Qazaqstanǵa ekstradıtsııalandy, — dep habarlady prokýratýradan. 

Qazir kúdikti ýaqytsha ustaý ızolıatoryna qamaldy.

Aıyptalǵan qylmystardy jasaǵany úshin múlki tárkilenip, segiz jyldan on eki jylǵa deıingi merzimge bas bostandyǵynan aıyrý jazasy qarastyrylǵan.

Aıta keteıik, buǵan deıin bul qylmystyq uıymnyń 2 múshesi Túrkııa men Reseıden qaıtarylǵan bolatyn.

Eske sala keteıik, buǵan deıin Shymkentte adam saýdasynyń qurbany bolǵan 15 adam qutqarylǵanyn jazǵan edik.