5 jeltoqsanda respýblıkadaǵy qaı joldar ashyq, qaısysy jabyq
ALMATY. KAZINFORM — 5 jeltoqsanda elimizdiń keı óńirlerinde aýa raıynyń jaqsarýyna baılanysty joldar qaıta ashylǵanymen, keı oblysta qozǵalys áli de shektelip otyr.
Saǵat 08:00–de aýa raıynyń jaqsarýyna baılanysty respýblıkalyq mańyzy bar birneshe jolda qozǵalys jandandy.
Pavlodar oblysy
«KAZ07 QHR shekarasy — Maıqapshaǵaı — Zaısan aınalma joly — Qalbataý — Semeı — Pavlodar — RF shekarasy» avtojolynyń 427-587-shaqyrymdary (Pavlodar qalasynan (Kenjekól k.) Abaı oblysy shekarasyna deıin) barlyq kólik túri úshin qozǵalys ashyldy.
Abaı oblysy
«QHR shekarasy — Maıqapshaǵaı — Zaısan aınalma joly — Qalbataý — Semeı — Pavlodar — RF shekarasy» 587-733-shaqyrym, Pavlodar oblysy shekarasynan Semeı qalasyna deıingi ýchaske ashyldy.
Al Qyzylorda oblysynda saǵat 09:00–de aýa raıynyń buzylýyna baılanysty «RF shekarasy — Mártók — Aqtóbe — Qarabutaq — Qyzylorda — Shymkent — Taraz — Qordaı — Almaty — Qorǵas — QHR shekarasy» avtojolynyń 1680-2045-shaqyrym aralyǵynda (III Internatsıonal aýyldyq okrýginen Besaryq aýylyna deıin) barlyq kólik túriniń qozǵalysyna shekteý qoıyldy. Joldy saǵat 12:00–de ashý josparlanǵan.
Sondaı-aq úsh óńirde buǵan deıin engizilgen shekteýler áli de kúshinde.
Pavlodar oblysy
«Astana — Shiderti — Pavlodar — Ýspenka — RF shekarasy» avtojolynda (Qalqaman eldi mekenine kireberis pen Astanaǵa shyǵatyn baǵyt) kóliktiń barlyq túri úshin qozǵalys shekteldi.
Soltústik Qazaqstan oblysy
«Tımırıazevo — Sarykól — oblys shekarasy» avtojolynyń 0-30-shaqyrymynda (Qostanaı oblysy shekarasy — Tımırıazevo aýyly) kóliktiń barlyq túri úshin shekteý bar.
Shyǵys Qazaqstan oblysy
Tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen — Altaı –Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde saqtalady.
Aýa raıy
2025 jylǵy 5 jeltoqsanda Aqmola, Soltústik Qazaqstan, Shyǵys Qazaqstan, Aqtóbe, Qaraǵandy, Abaı, Jetisý, Túrkistan, Qostanaı jáne oblystarynyń keı jerinde qar aralas jańbyr men qar jaýady.
— Sol sebepti júrgizýshilerge jyldamdyq rejımi men qaýipsiz araqashyqtyqty qatań saqtap, joldardaǵy aýa raıynyń qolaısyzdyǵyn eskerýlerińizdi suraımyz, — delingen habarlamada.
Eske salaıyq, buǵan deıin «Qazgıdromet» RMK 5 jeltoqsan kúngi aýa raıy boljamyn jarııalaǵan edi.