5 jasar balany qutqarǵan oqýshy kópbalaly otbasynan shyqqan

ASTANA. QazAqparat - Astanadaǵy №39 keshki mekteptiń dırektory Anar Qojahmet qudyqtan balany shyǵarǵan 10-synyp oqýshysy Nádir Omarǵazıev týraly aıtyp berdi, dep habarlaıdy QazAqparat tilshisi.

Buǵan deıin oqýshynyń bes jasar balany qutqarǵanyn habarlaǵan bolatynbyz.

«Nádir Omarǵazıev kópshil, talantty jáne óte tárbıeli bala. Ol kópbalaly otbasynan shyqqan jáne onyń bes baýyry bar. Omarǵazıevter áýleti jaldamaly páterde turady», - dedi Anar Qojahmet.

Onyń aıtýynsha, Nádir án salǵandy unatady jáne tanymal ánshi bolýdy armandaıdy.

«Dúısenbi kúni mektepte saltanatty shara uıymdastyrylady. Onda mektep basshylyǵy Nádirdi erligi úshin marapattaıdy», - dedi dırektor.