5 jasar bala koronavırýs juqtyrdy: Óńirlerde anyqtalǵan sońǵy jaǵdaılar
NUR-SULTAN. QazAqparat – Qazaqstanda koronavırýs ınfektsııasyn juqtyrý boıynsha sońǵy anyqtalǵan 39 jaǵdaıǵa qatysty málimet berildi, dep habarlaıdy QazAqparat coronavirus2020.kz saıtyna silteme jasap.
Aıtap aıtsaq, 18 sáýir kúni (saǵat 22:30-daǵy jaǵdaı boıynsha) - 15 jaǵdaı, 19 sáýirde (saǵat 09.00-degi málimet) 24 jaǵdaı tirkelgen bolatyn. Onyń ishinde Qostanaı oblysynda – 6, Batys Qazaqstan oblysynda – 7, Aqmola oblysynda – 1, Qyzylorda oblysynda – 4 jáne Pavlodar oblysynda 4 naýqas anyqtaldy.
Qostanaı oblysynda 77, 71, 70, 33 jáne 3 jastaǵy 5 adam naýqas adamdarmen kórshiles bolǵan. Olar Jitiqara ınfektsııalyq bólimshesine jatqyzylyp, qajetti em qabyldaýda.
Altynshy jaǵdaı Arqalyq qalasynyń 48 jastaǵy turǵynynan anyqtaldy. Aýrýhanaǵa jatqyzylyp, indetti qalaı juqtyrǵany anyqtalyp jatyr.
Batys Qazaqstan oblysynda anyqtalǵan 7 naýqastyń barlyǵy Reseı Federatsııasynda vahtalyq ádis boıynsha jumys isteıtin óńir turǵyndary. Olardyń eń kishisi – 20 jasta, eń úlkeni - 47-de.
«Olardy epıdemıologtar «Tasqala« sanıtarlyq-karantındik ótkizý pýnktinde kontaktisiz termometrııa júrgizý kezinde anyqtady. Dene qyzýy bolmaǵan, alaıda algorıtmge sáıkes barlyq azamattar karantındik statsıonarǵa jatqyzyldy. PTR dıagnostıkalyq zertteý nátıjeleri boıynsha 7 patsıentte KVI dıagnozy naqtylandy. Naýqastar oblystyq juqpaly aýrýlar aýrýhanasyna jetkizildi. Qazirgi ýaqytta jaǵdaılary qanaǵattanarlyq», - delingen aqparatta.
Aqmola oblysynda tirkelgen naýqas – Tselınograd aýdanynda turatyn 20 jastaǵy qyz bala. Ol buǵan deıin anyqtalǵan naýqaspen bir úıde turady. Karantınge oqshaýlandyrylǵan bolatyn.
Qyzylorda oblysynda 4 naýqastyń ekeýi Qyzylorda qalasynan, ekeýi Jańaqorǵan aýdanynan anyqtaldy. Olar 27 jáne 68 jastaǵy áıelder, 19 jáne 65 jastaǵy er adamdar.
«Úsheýi KVI juqtyrǵandarmen baılanysta bolǵan. Buǵan deıin karantınge oqshaýlandyrylǵan. Al tórtinshi adamnan indet pnevmonııa sımptomdaryna baılanysty synama alynǵan kezde anyqtaldy», - delingen málimette.
Pavlodar oblysynda 4 naýqastyń ekeýi – 32 jáne 25 jastaǵy Pavlodar qalasynyń turǵyndary.
Qalǵan ekeýi – 65 jáne 59 jastaǵy Ekibastuz qalasynyń turǵyndary. Barlyǵy aýyrǵan adamdarmen baılanysta bolǵandar.
