Túrkııa men Sırııa jańa áskerı kelisimge qol qoıýǵa daıyndalyp jatyr
ASTANA. KAZINFORM – Bıyl tamyz aıynyń sońyna qaraı Ankara men Damask áskerı yntymaqtastyq týraly aýqymdy kelisimge qol qoıýdy josparlap otyr, dep habarlaıdy Kazinform tilshisi.
Bul kelisim ekijaqty qarym-qatynastardy damytýdaǵy betburys jáne aımaqtaǵy kúshter balansynyń ózgerýine aınalýy múmkin.
Aldyn ala málimet boıynsha, elder arasyndaǵy kelisim Túrkııanyń Sırııanyń jańa bıligine qarýly kúshterdi reformalaýda, áskerı qyzmetkerlerdi oqytýda, sondaı-aq Túrkııanyń áýe shabýylyna qarsy qorǵanys júıeleri men ushqyshsyz ushaqtaryn Sırııa terrıtorııasynda ornalastyrýǵa járdemdesýdi qamtıdy.
Bolashaq kelisimniń eń kóp talqylanǵan tarmaqtarynyń biri Túrkııanyń Sırııada úsh áskerı bazasynyń ashylýy múmkindigi boldy. Boljam boıynsha, olar strategııalyq mańyzdy núktelerde – Palmırada, Tıfor (Tııas) avıabazasynda jáne soltústik Menag bazasynda paıda bolýy múmkin. Degenmen, bul aqparatty Ankara men Damaskiden áli resmı rastaǵan joq.
Túrkııanyń Ulttyq qaýipsizdik keńesi buǵan deıin Sırııanyń jańa bıliginiń eldiń aýmaqtyq tutastyǵyn qalpyna keltirý jáne lańkestikpen kúresý áreketterine qoldaý bildirgen. Ankara sondaı-aq Damasktyń Túrkııadan ishki qaýipsizdik jáne ekstremıstik toptarmen kúres máselelerinde resmı túrde kómek suraǵanyn habarlady.
Belgili bolǵandaı, Sırııanyń soltústik-shyǵysyndaǵy kúrd kúshteriniń róline erekshe nazar aýdarylady. Túrik aqparat quraldary Sırııa demokratııalyq kúshteriniń (SDF) jetekshisi Mazlým Abdıdiń Sırııa prezıdenti Ahmed ál-Sharaamen naýryzdaǵy kelisimniń sharttaryn oryndamaı jatqanyn, oǵan sáıkes kúrd bólimsheleri 2025 jyldyń sońyna deıin Sırııa armııasyna biriktirilýi kerek dep birneshe ret habarlady.
Eske sala keteıik, buǵan deıin Túrkııa tamyz aıynda Ázerbaıjan gazyn Sırııaǵa eksporttaýdy bastaıtynyn jazǵan bolatynbyz.