5-shi Dúnıejúzilik kóshpendiler oıyndary: Tsıfr men qyzyq derek
ASTANA. KAZINFORM – 8-13 qyrkúıek aralyǵynda elordada Uly dalany dúbirge bólegen 5-shi Dúnıejúzilik kóshpendiler oıyndary dúrkirep ótti.
Jer-jahannyń 90-ǵa jýyq memleketinen kelgen 2500-ge tarta sportshy bir aptaǵa jýyq kóshpendi halyqtardyń tól sportynan synǵa túsip, 97 medal jıyntyǵyn sarapqa saldy. Osy oraıda Týrızm jáne sport mınıstrligi kóshpendiler Olımpıadasynda tirkelgen qyzyqty derekterdi usyndy.
Qazaqstan qorjynynda qansha júlde bar?
Alty kúngi alamanda Ulttyq qurama sportshylary 43 altyn, 32 kúmis, 37 qola (jalpy 112 medal) júlde oljalap, jalpykomandalyq esepte birinshi orynǵa ıe boldy. Oıyndarda jalpy sany 33 eldiń sportshysy medal ıelendi. Júlde alǵan memleketter qatarynda muhıttyń arǵy betinen kelgen Kanada men Meksıka ókilderi de bar.
Qazaq kúresine qansha sportshy qatysty?
Dúbirli doda aıasynda tól kúresimizden ótken jarysqa álemniń 44 elinen 294 palýan baq synady. Bul – qazaq kúresiniń dúnıejúzi boıynsha qarqyndy damyp kele jatqanynyń aıqyn kórinisi. Júlde alǵan elder qatarynda kórshi memleketterden bólek, Eýropa palýandary da bar. Atap aıtqanda, qazaq kúresinen beldesýlerde Italııa, Polsha, Majarstan, Nıderland sportshylary júldege qol jetkizdi.
Jankúıeri erekshe kóp bolǵan sport túri
5-shi Dúnıejúzilik kóshpendiler oıyndarynda eń kóp kórermen kókpar men kókbóri jarystaryna keldi. «Qazanat» ıppodromynda ótken eki saıystyń da fınaldyq básekesin 20 myń (ár fınalǵa 10 000 kórermen keldi) jankúıer tamashalady.
Eń kóp sportshy alyp kelgen elder
Qazaqstan quramasynyń sportshylaryn esepke almaǵanda, bıylǵy oıyndarǵa eń kóp sportshyny Qyrǵyzstan quramasy qosty – 172 sportshy.
Oıyndarǵa qatysqan eń jas sportshy - Hamza Amangeldi. Alaman báıgede baq synaǵan Hamza nebári 10 jasta.
Eń egde sportshy – 80 jastaǵy ıspanııalyq Soledad Hımenes Karrıon. Ol dástúrli sadaq atý saıysynda óner kórsetti.
Oıyndarǵa qansha erikti jumyldyryldy?
Sportshylar men delegatsııa ókilderine 1600 volonter kómek kórsetti. Onyń ishinde 20 sheteldik erikti bar.
5-shi Dúnıejúzilik kóshpendiler oıyndaryna qansha jylqy qatysty?
Kóshpendiler oıyndarynda kóp sport túri jylqylardyń kómegimen oınalatyn bolǵan soń, bıylǵy dodaǵa jalpy sany 499 bas jylqy qatysty. Onyń ishinde 100 bas Ulttyq quramanyń jylqysy, Oıyndardy uıymdastyrý dırektsııasy jylqysyz kelgen ózge elderdiń qatysýshylary úshin 300 bas jylqy jalǵa alǵan. Sondaı-aq, Qyrǵyz Respýblıkasy – 91, Ózbekstan Respýblıkasy – 8 bas jylqy ákeldi.
Sonymen qatar jarystarǵa 41 qus qatysty. Onyń ishinde 9 bas ulttyq quramǵa, 8 bas Qyrǵyzstan Respýblıkasyna tıesili. 24 bas qusty ózge elder úshin Qusbegilik federatsııasy usyndy.
Kóshpendiler oıyndary ıÝNESKO-nyń zattaı emes mádenı muralarynyń tizimine engenin jazǵan bolatynbyz.
