⁠5 sáýirden keıin mopedterin tirkemegenderge qandaı jaýapkershilik kózdelgen

ASTANA. KAZINFORM — Іshki ister mınıstrliginde mopedterdi tirkeý tártibi túsindirildi. 

Mopedti tirkeý erejeleri qandaı? Qandaı qujattar kerek?

- Mopedterdi tirkeý úshin turǵylyqty jeri boıynsha mamandandyrylǵan halyqqa qyzmet kórsetý ortalyǵyna barý qajet. Jeke basyn kýálandyratyn qujat, elektrondy túrde de bolady, mopedtiń tehnıkalyq qujatyn nemese tehnıkalyq sıpattamalary týraly málimetti usyný qajet. Sodan soń ótinish toltyryp, mopedti tekserip, sondaı-aq ony tirkeý (0,25 AEK) jáne tirkeý týraly kýálik (1,25 AEK) pen memlekettik nómir (1,4 AEK) úshin memlekettik bajdardy tóleý kerek, - dedi departament bastyǵy - ІІM resmı ókili Shyńǵys Alekeshev.

Eger eshqandaı qujat bolmasa, mopedti qalaı tirkeýge bolady?

- Eshqandaı qujat nemese VIN-kod bolmaǵan jaǵdaıda ıa bolmasa qandaı da bir sebepterge baılanysty mopedtiń shyǵarylǵan jylyn belgileý múmkin bolmasa, ony ishki ister organdary tekserý júrgizgennen keıin beredi. Bul rette ony qarap-tekserý júrgizilgen jyl mopedtiń shyǵarylǵan jyly bolyp esepteledi, - dedi spıker.

Mopedti basqarý úshin kýáliktiń qandaı sanattary qajet?

- «Jol júrisi týraly» zańǵa sáıkes mopedti basqarý úshin A1 sanaty bar kýálik qajet. Eger júrgizýshiniń A nemese V sanatyndaǵy kýáligi bolsa, ol da mopedti basqara alady, - dedi polıtsııa polkovnıgi. 

Mopedterge arnalǵan memlekettik tirkeý nómirlik belgileri qandaı tártippen beriledi?

- Mopedterge memlekettik nómir berý qoldanystaǵy tártipke sáıkes júzege asyrylady, ıaǵnı júıe avtomatty túrde nómirdi tańdaıdy. Mysaly, dál osyndaı tásil mototsıklderge de qatysty qoldanylǵan, - dep jaýap berdi vedomstvonyń resmı ókili.

⁠5 sáýirden keıin mopedterin tirkemegenderge qandaı jaýapkershilik kózdelgen?

- Zańǵa sáıkes 5 sáýirden keıin tirkelmegen mopedterdi basqarýǵa tyıym salynady. Quqyq buzýshylyq anyqtalǵan jaǵdaıda Ákimshilik quqyq buzýshylyq týraly kodekstiń 590-babynyń 2-tarmaǵymen ákimshilik jaýapkershilik kózdelgen (10 AEK aıyppul), - dedi spıker.

Aıta ketelik Almatyda tirkelgen mopedter sany 100-den asqan edi.