5 sáýirden keıin Almatyda 800 moped aıypturaqqa qoıyldy
ALMATY. KAZINFORM - Sáýir aıynyń basynan beri Almatyda moped júrgizýshileri 2 600-den astam jol erejesin buzǵan.
2025 jyldyń 5 sáýiri, ıaǵnı mopedterdi paıdalanýǵa qoıylatyn jańa talaptar kúshine engennen beri Almatyda 800-den astam motokólik mamandandyrylǵan aıyppul turaǵyna qoıyldy. Quqyq buzýshylyqtardy anyqtaý sharalary «Qaýipsiz jol» jedel-profılaktıkalyq is-sharasy aıasynda júrgizildi.
- Mopedterdi paıdalanýǵa qoıylatyn jańa talaptar kúshine engen sátten bastap biz oń dınamıkaǵa kýá boldyq: qujattaryn rásimdep, tirkep jatqan azamattar kóbeıip keledi. Degenmen, zańdy elemeıtinder áli de bar. Azamattardy motokólikterin der kezinde zańdastyrýǵa shaqyramyz. Bul tek zań talaby ǵana emes, sonymen qatar jeke qaýipsizdik máselesi. Tirkeý jalǵasyp jatyr, báriniń óz mopedin qoldanystaǵy erejelerge sáıkestendirýge múmkindigi bar, - dedi Jergilikti polıtsııa qyzmeti basqarmasynyń bastyǵy Serik Shýmaev.
Eske salaıyq, buǵan deıin moped pen elektrli samokattyń kesirinen 1,7 myń adam japa shekkenin jazǵanbyz.