5 saǵat boıy tutqynda bolǵan kelinshek ózin mazalamaýdy surady
AQTÓBE. QazAqparat - Búgin Aqtóbe oblystyq ishki ister departamentiniń ǵımaratyna barǵan Ásem tilshilerden ózin mazalamaýdy surady. Ol jaǵdaıynyń nashar ekenin aıtyp, sózderin burmalamaýdy ótindi, dep habarlaıdy QazAqparat tilshisi.
Aqtóbe oblystyq ishki ister departamenti búgin arnaıy baspasóz máslıhatyn ótkizdi. Sebebi, 14 naýryz kúni Abylaı Tileýovtyń qolynda 5 saǵat boıy kepilde bolǵan kelinshek ózin suraqtarmen mazalaǵan tilshilerge bir ret resmı jaýap berýdi jón kórdi.
«Qazir «Jemchýg+» stomatologııalyq klınıkasyndaǵy qylmystyq oqıǵaǵa baılanysty is tergelip jatyr. Oblystyq ishki ister organdary jábirlenýshiler men kýágerlerden jaýap alyp, birneshe sot-medıtsınalyq saraptama taǵaıyndaldy. Tabeldi qarýdy qoldaný deregi boıynsha da qyzmettik tekserý júrgizilip jatyr», - dedi oblystyq ishki ister departamenti bastyǵynyń orynbasary Ernar Qalıaqparov.
Baspasóz máslıhatynda kepilde bolǵan kelinshek ózin mazalamaýdy ótinip surady. «Meniń basymnan ótken jaǵdaıdy sózben aıtyp jetkizý múmkin emes. Polıtsııa qyzmetkerleriniń qarý qoldanǵany týraly da aıta almaımyn. Quqyq qorǵaýshylar meniń ómirimdi saqtap qaldy, alǵysym sheksiz», - dedi jábirlenýshi Ásem.
Buǵan deıin habarlaǵanymyzdaı, 14 naýryz kúni keshki saǵat 19:00-de Abylaı Tileýov «Jemchýg+» stomatologııalyq klınıkasyn baryp, ákimshini tutqynǵa aldy. Keıin 7 naýryz kúni ajyrasyp ketken áıelin ákelýdi talap ett i. Arnaıy operatsııa kezinde tabeldi qarý paıdalanylyp, A.Tileýov oqıǵa ornynda kóz jumdy. Keıin sol kúni bolǵan oqıǵa týraly kelissózdiń beıneaıǵaǵy ǵalamtorǵa shyǵyp ketti. Qazir osy derekke qatysty qyzmettik tekserý bastaldy.
