5 óńirdiń sharýalaryna yqtımal sý tapshylyǵy jaıly boljamdy jetkizdik — mınıstr
TAShKENT. KAZINFORM — 5 oblystaǵy sharýa qojalyqtaryna bıyl bolýy yqtımal sý tapshylyǵy týraly eskertildi. Muny Tashkentte ótken «Water week» forýmy aıasynda Kazinform tilshisiniń saýalyna jaýap bergen Sý resýrstary jáne ırrıgatsııa mınıstri Nurjan Nurjigitov aıtty.
— Biz bul jumystardy byltyr qarasha aıynda bastadyq. Qyzylorda, Túrkistan, Jambyl, Almaty jáne Jetisý óńirlerine baryp, sharýa qojalyqtarymen kezdestik. Yqtımal sý tapshylyǵy týraly boljamdy sharýalarǵa jetkizdik, eskerttik, óıtkeni olar daıyndalýy kerek. Onyń birneshe joly bar. Alǵashqysy — ol sý únemdeý tehnologııalaryn engizý. Bul rette atalǵan 5 oblysqa memleket tarapynan qomaqty qarajat bólindi. Sońǵy úsh jylmen salystyrǵanda, aldaǵy úsh jylǵa baǵyttalǵan qarjy kólemi 4 ese ósti. Odan bólek ylǵaldy kóp talap etetin daqyldardyń ornyna basqa ónim egý isine erekshe nazar aýdaryp jatyrmyz, — dedi Nurjan Nurjigitov Kazinform tilshisiniń saýalyna jaýap bere otyryp.
Vedomstvo basshysy atap ótkendeı, keshendi jospar aıasynda 14,5 myń shaqyrym ırrıgatsııalyq júıege jóndeý júrgizilip jatyr. Onyń nátıjesinde sýdy 20%-ǵa únemdeýge múmkindik týady.
Eske salaıyq, Water week» forýmynda sóz sóılegen Sý resýrstary jáne ırrıgatsııa mınıstri Nurjan Nurjigitov Qazaqstan sý sharýashylyǵy salasyndaǵy ulttyq saıasatty únemi jetildirip jatqanyna toqtaldy.
Sondaı-aq, ol Qazaqstan men Ózbekstan Syrdarııa ózenine sýdy esepke alatyn qurylǵylardy ornatyp jatqanyn málim etti.
Munymen birge, mınıstr bıyl sáýirde elordada ótetin Óńirlik ekologııalyq sammıtinde Astana deklaratsııasy qabyldanatynyn aıtty.
