5 oblys ákiminiń orynbasary senator bolǵysy keledi
ASTANA. QazAqparat - 5 oblys ákiminiń orynbasary senator bolǵysy keledi, dep habarlaıdy QazAqparat.
QR Ortalyq saılaý komıssııasynyń málimetinshe, QR Parlamenti Senaty depýtattyǵyna 52 kandıdat tirkelgen. Tirkelgen kandıdattar tiziminde qazirgi 4 senator bar. Olar: Almaty oblysynan N.Qylyshbaev, Qostanaı oblysynan J.Nurǵalıev, Qyzylorda oblysynan M.Bahtııaruly, Mańǵystaý oblysynan B.Shelpekov.
Munan bólek, Parlament Májilisiniń eks-depýtaty D.Núketaeva, áıgili grek-rım palýany Shámil Serikovtiń balasy Tımýr Serikov, máslıhat hatshylary A.Baımýldınov (Shyǵys Qazaqstan oblysynan), R.Ábdikerov (Qaraǵandy oblysynan), E.Ájikenov (Qyzylorda oblysynan) senatorlyqqa úmitkerler tizimine enip otyr. Munan bólek, Aqmola, Aqtóbe, Atyraý, Shyǵys Qazaqstan, Jambyl oblystary ákimderiniń orynbasarlary: D.Ádilbekov, M.Jumaǵazıev, G.Dúısembaev, D.Mýsın, A.Nuralıev, Oral qalasynyń ákimi N.Tóreǵalıev, SQO-nyń burynǵy ákimi E.Sultanov ta senator bolǵysy keledi.
Aıta keterligi, búginnen bastap Senat depýtattyǵyna tirkelgen kandıdattardyń barlyǵy 27 maýsym kúngi 00.00-saǵatqa deıin sozylatyn saılaý aldyndaǵy úgitke kirisý múmkindigine ıe. Barlyq kandıdattarǵa úgit jumysyn júrgizý úshin birdeı jaǵdaılarǵa kepildik berilgen. Úgit naýqany barysynda saılaý zańnamasy normalarynyń saqtalýyn baqylaýdy qamtamasyz etý maqsatynda Ortsaılaýkom, oblystyq, Astana jáne Almaty qalalyq saılaý komıssııalary BAQ monıtorıngin júzege asyratyn bolady.
