5 oblysta sý tasqynyna qarsy kúres sharalaryn kúsheıtý qajet bolyp tur

ASTANA. KAZINFORM - Premer-mınıstrdiń orynbasary Qanat Bozymbaev sý tasqyny qaýpi joǵary kezeńge daıyndyq máseleleri boıynsha keńes ótkizdi.

Vıtse-premer sý sharýashylyǵy nysandarynyń, joldar men kópirlerdiń, jedel den qoıý kúshteri men quraldarynyń daıyndyǵyn tekserip, «Talsim» júıesiniń boljamdyq derekterimen jáne «Tasqyn» júıesindegi sý tasqynyn modeldeý nátıjelerimen tanysty. Sonymen qatar qaýip deńgeıi joǵary aımaqtarǵa jatqyzylǵan óńirlerdiń esepteri tyńdaldy.

Óńirlerde sý tasqynynyń aldyn alý boıynsha aýqymdy jumystar atqaryldy. 831 shaqyrym qorǵanys bógetteri salynyp, topyraq úıindileri turǵyzyldy. 1 myń shaqyrymnan astam drenaj júıeleri, arnalar men aryqtar jóndelip, qaıta salyndy. Avtomobıl jáne temirjol ýchaskelerinde 934 sý ótkizý qurylysy ornatylyp, aýystyryldy, Shyǵys Qazaqstan jáne Qostanaı oblystarynda kópirlerge kúrdeli jóndeý júrgizildi. Sý tasqyny qaýpi bar ózen ýchaskelerinde shamamen 166 shaqyrym arnany tereńdetý, 255 shaqyrym jaǵalaýdy bekitý, 221 shaqyrym arnalardy túzeý jáne 172 shaqyrym sý arnasy men ózen arnalary tazartyldy. Sý tasqynyna qarsy is-sharalar júrip jatyr. Qarasha-qańtar aılary aralyǵynda Tótenshe jaǵdaılar mınıstrliginiń laýazymdy tulǵalary barlyq óńirdi aralap, olardyń sý tasqyny qaýpi joǵary kezeńge daıyndyǵyn baǵalady.

«Qazgıdromet» RMK-nyń aldyn ala gıdrologııalyq boljamyna sáıkes, bıylǵy kóktemde respýblıkanyń basym bóliginde jaýyn-shashyn mólsheri normadan joǵary bolady dep kútilip otyr. Osyǵan baılanysty óńirlerdegi sý tasqyny qaýpine aldyn ala baǵa berildi.

Premer-mınıstrdiń orynbasary Aqmola, Soltústik Qazaqstan, Qaraǵandy, Shyǵys Qazaqstan jáne Abaı oblystarynda sý tasqynynyń aldyn alý sharalaryn kúsheıtý qajettigin basa aıtty.

-Kóktemniń basy jyly ári jaýyn-shashyndy bolady dep kútilip otyr. Ótken kúzde tolassyz jaýǵan jańbyr birqatar óńirde jer betinde muz qyrtysynyń túzilýine ákeldi, bul sý tasqyny jaǵdaıyn kúrdelendirýi múmkin. Osyǵan baılanysty túrli jaǵdaıǵa daıyn bolyp, qajetti sharalardy aldyn ala qabyldaý mańyzdy. Bul, ásirese, Aqmola, Soltústik Qazaqstan, Qaraǵandy oblystary men Abaı oblysynyń ákimdikterine qatysty, óıtkeni ol óńirlerde birqatar másele bar, al olardyń keıbiri boıynsha sheshim áli kúnge deıin qabyldanbaǵan, — dep atap ótti Qanat Bozymbaev.

Vıtse-premer barlyq ákimdikke qajet bolǵan jaǵdaıda ózenderde jarylys jumystaryn aldyn ala júrgizýdi, sý burý arnalary men aryqtardy, sý ótkizý qurylystaryn jáne nóserlik káriz júıelerin tazalaýdy, sondaı-aq qardy ýaqtyly áketýdi tek qalalarda ǵana emes, aýyldyq eldi mekenderde de qamtamasyz etýdi tapsyrdy.

Ekologııa mınıstrligine aýa raıy jaǵdaıyna kúndelikti monıtorıng júrgizip, jaǵdaı kúrdelengen kezde múddeli organdarǵa dabyldy eskertýlerdi jedel jetkizý tapsyryldy.

Sý resýrstary mınıstrligine sý qoımalaryn toltyrý kólemderin aıqyndap, olardy turaqty baqylaýda ustaý, qajet bolǵan jaǵdaıda sýdy aldyn ala ári qaýipsiz aǵyzýdy uıymdastyrý, sondaı-aq transshekaralyq sý aıdyndary boıynsha kórshiles memlekettermen turaqty aqparat almasýdy jolǵa qoıý tapsyryldy.

Jasandy ıntellekt mınıstrligine múddeli memlekettik organdarmen birlesip, «Tasqyn» júıesinde óńirlerdegi yqtımal jaǵdaıdy modeldeý, «Talsim» júıesiniń derekterin ıntegratsııalaý jáne áleýeti osal eldi mekenderdi aıqyndaý tapsyryldy.

Tótenshe jaǵdaılar mınıstrligine «Kóktem-2026» oqý-jattyǵýyn aldyn ala ótkizý, sý tasqyny jaǵdaıy kúrdelengen kezdegi is-qımyl algorıtmderin pysyqtaý, sý tasqynyna qarsy is-sharalardy úılestirýdi jáne azamattyq qorǵaýdyń memlekettik júıesiniń kúshteri men quraldarynyń daıyndyǵyn qamtamasyz etý júkteldi.

Іshki ister mınıstrligimen birlesip, sý basý qaýpi týyndaǵan jaǵdaıda halyqty ýaqytyly evakýatsııalaý máselelerin pysyqtaý, sondaı-aq azyq-túlik, janar-jaǵarmaı, dári-dármek jáne basqa da tirshilikti qamtamasyz etý quraldarynyń qajetti qoryn qalyptastyrý, ásirese kólik qatynasy úzilýi múmkin eldi mekenderde, tapsyryldy. Qosymsha ınertti materıaldar, topyraq toltyrylǵan qaptar qory jáne ınjenerlik tehnıkanyń rezervi jasalýy tıis.

Osyǵan deıin óńirlerde sý tasqynynyń aldyn alý sharalary qalaı júzege asyrylyp jatqany týraly materıal jarııaladyq.