5 myńnan astam sheteldiktiń elde bolý merzimi buzylǵan – QR ІІM
Operatsııa barysynda polıtsııa sheteldikter kóp turatyn jerlerdi, qurylys nysandaryn, bazarlardy, sheteldikterdiń jaldamaly eńbegin paıdalanatyn uıymdar men jumys berýshilerdi teksergen.
«Operatsııanyń 8 kúninde 9 213 kóshi-qon zańnamasyn buzýshylyq anyqtaldy. Onyń ishinde 5 113-i sheteldikterdiń elde bolý merzimin buzýymen baılanysty. Ózderine kelgen sheteldikter týraly polıtsııany ýaqtyly habardar etpegeni úshin 3 631 jeke jáne zańdy tulǵa jaýapqa tartyldy», - dedi Іshki ister mınıstrliginiń onlaın-brıfıngisinde vedomstvo ókili Shuǵyla Turlybek.
Kóshi-qon zańnamasyn buzýshylardy elden shyǵarý týraly 674 sot sheshimi shyǵaryldy.
«Barlyq shyǵarylǵan adamdarǵa Qazaqstanǵa kirýge 5 jylǵa tyıym salyndy. Óz elinde qylmys jasaǵany úshin izdeýde júrgen 22 sheteldik ustaldy. Reıd júrgizý kezinde Jambyl oblysynda elimizge zańsyz kirgen Pákistannyń 9 azamaty ustaldy. Almatyda 2022 jylǵy qarashada memlekettik shekarany zańsyz kesip ótken Qyrǵyz Respýblıkasynyń azamaty ustaldy. Osy faktiler boıynsha sotqa deıingi tergeý, sondaı-aq zańsyz ımmıgranttarǵa baspana bergen adamdarǵa qatysty da tergeý júrgiziledi», - dedi Sh. Turlybek.
